Лионел Месси спорт соҳасидаги 2026 йилги Астурия маликаси мукофотига сазовор бўлди. Мукофотни унга Испания маликаси Леонор топширди. Маросим Овиедо шаҳридаги Кампоамор театрида бўлиб ўтди, унда қирол Фелипе VI ва қиролича Летисия иштирок этди.
Месси 1987 йилда таъсис этилган ушбу мукофотни жамоа таркибида эмас, балки шахсан қўлга киритган илк футболчига айланди. Бундан ташқари, у совриндорлар орасидаги биринчи аргентиналикдир.
Ҳакамлар ҳайъати қарорни 3 июнь куни эълон қилган эди. Месси 12 мамлакатдан кўрсатилган 27 номзод орасидан танлаб олинди. Ҳайъат хулосасида унинг истеъдоди, ёрқин фаолияти ҳамда хайрия ишлари — болаларнинг таълим ва тиббиётдан фойдаланишига кўрсатган ёрдами алоҳида қайд этилган. Ҳакамлар ҳайъати, шунингдек, унинг камтарлиги ва жамоавий ўйинга содиқлигини таъкидлаб ўтди. Ғолибга 50 минг евро ва Жоан Миронинг ҳайкалчаси топширилади.
Мукофот футболчи учун шахсий аҳамиятга ҳам эга. Унинг сўзларига кўра, 8 август куни вафот этган отаси Хорхе ушбу мукофотни жуда кутган ва Испанияга боришга ундаган.
Маълумот учун. Мукофотнинг берилиши баҳс-мунозараларга сабаб бўлди. Аргентина ва Испания ўртасидаги 2026 йилги жаҳон чемпионати финалидан сўнг испаниялик мухлисларнинг бир қисми аргентиналикларнинг хатти-ҳаракатларидан норози бўлиб қолган эди. Change.org платформасида Мессини мукофотдан маҳрум қилиш талаби билан ўнлаб петициялар пайдо бўлди. Жамғарма уларга оммавий тарзда жавоб қайтармади.
