Беларус ҳукумати Дирк Шубелнинг визаси ва аккредитациясини узайтиришдан бош тортди. 64 ёшли немис дипломати Беларусда инсон ҳуқуқлари бузилишини кескин танқид қилган.
Кескин танқидий баёнотлар фонида Европа иттифоқининг Беларусдаги элчиси - немис дипломати Дирк Шубел Минскдаги ўз лавозимини тарк этди. «Беларус ҳукумати виза ва аккредитацияни яна бир йилга узайтирмасликка қарор қилди, бу эса мандатимни бажаришни жуда қийинлаштирмоқда», — деб ёзди Шубел 11 октябр, сешанба куни ўзининг Facebook’даги саҳифасида.
2019 йилдан буён ЕИнинг Минскдаги миссиясини бошқариб келаётган 64 ёшли дипломат ўз постида Беларусда 2020 йилги президентлик сайловларидан сўнг «инсон ҳуқуқлари ва халқаро ҳуқуқнинг қўпол тарзда бузилишини» танқид қилди. Қайд этилишича, «сайлов натижалари сохталаштирилган ва бегуноҳ одамларга доимий зўравонлик билан амалга оширилган».
Шубелга кўра, бугун Беларусда 1340 дан ортиқ сиёсий маҳбус бор, Европа иттифоқи уларни ҳеч қандай шартларсиз зудлик билан озод этишни талаб қилмоқда. Дипломат 7 октябрь куни тинчлик бўйича Нобел мукофотини олган ҳуқуқ ҳимоячиси Алес Беляцкийни озод қилишга чақирди. Беляцкийга ушбу мукофот Россиянинг «Мемориал» инсон ҳуқуқлари ташкилоти ва Украина фуқаролик эркинликлари маркази билан бирга берилди.
Европа иттифоқи ҳозирда Александр Лукашенкони Беларус президенти сифатида тан олмайди ва Беларус мухолифати етакчиларидан бири, сургундаги Светлана Тихановскаяни қўллаб-қувватламоқда. Кўпгина беларуслар Тихановскаяни 2020 йилги президентлик сайловларида ғолиб деб билишади.
Дирк Шубелнинг айтишича, бундан буён у Украина, Арманистон, Грузия ва собиқ СССРнинг бошқа республикаларида фуқаролик жамиятини мустаҳкамлашга қаратилган Европа иттифоқининг Шарқий ҳамкорлик дастурида иштирок этади.
