Ракеталарни учиришга Ким Чен Ин бошчилик қилди. Пхеняннинг таъкидлашича, синовлардан мақсад - «ядровий жанговар кучларнинг реакция билдириш даражасини ошириш»ни синаб кўриш.
Шимолий Корея 12 октябр, чоршанба куни қатор ракета синовларини давом эттирди. Иккита узоқ масофага учувчи қанотли ракеталарнинг учирилишига Шимолий Корея етакчиси Ким Чен Ин бошчилик қилди ва уларнинг натижаларидан мамнун бўлди, дея хабар беради Корея марказий ахборот агентлиги (КМАА). Пхеняннинг таъкидлашича, синовлардан мақсад - «ядровий жанговар кучларнинг реакция билдириш даражасини ошириш» бўлган.
Жанубий Пёнган провинциясидан Сариқ денгиз томон учирилган ракеталар 2000 километр масофани 10 234 сонияда (3 соатдан сал камроқ) босиб ўтди ва нишонга аниқ тегди, дея қайд этади КМАА. У нишон нимадан иборат бўлганини аниқлаштирмаган. Айни пайтда ғарб экспертлари бу ракеталар ядровий каллакларни олиб юришга қодирлигига шубҳа қилмоқда, деб ёзади dpa.
Пхенян томонидан ўтказиладиган бундай синовларни диққат билан кузатувчи Жанубий Корея, Япония ва АҚШ томонидан янги ракеталар учирилгани рўйхатга олинганми ёки йўқми, ҳозирча номаълум. Шимолий Кореянинг қанотли ракеталари, одатда, баллистик ракеталарга қараганда камроқ қизиқиш уйғотади, чунки улар БМТ Хавфсизлик кенгаши резолюцияларида аниқ тақиқланмаган, деб таъкидлайди Reuters.
Шимолий Корея сентябр ойи охиридан бери ракета синовларини тез-тез ўтказяпти. Октябр ойи бошида КХДР томонидан учирилган баллистик ракета беш йил ичида биринчи марта Япония архипелаги устидан учиб ўтганди, бу Токио, Сеул ва жаҳон ҳамжамияти бошқа вакилларининг норозилигига сабаб бўлди.
Бунга жавобан АҚШ ва Жанубий Корея ер-ер синфидаги ракеталарни икки маротаба синовдан ўтказди. «Ёнҳап» агентлигининг Жанубий Корея Бош штабига таяниб хабар беришича, Америка ва Жанубий Кореянинг ATACMS ракеталари Япон денгизи томон йўналтирилган. Айни вақтда, Сеул томонидан отилган ракеталардан бири ҳарбий база ҳудудига тушган.
