30 октябрда эълон қилинган маълумотга кўра, эҳтимолий битим қиймати тахминан 2,1 миллиард долларни ташкил этади. Асосий пудратчи АҚШнинг Lockheed Martin компанияси бўлади.
Харидни Канада, Германия ва Норвегия маблағлари, шунингдек, Европа Иттифоқи Украинага ажратган кредит ҳисобидан молиялаштириш кўзда тутилган. Битимда АҚШ ҳукумати маблағларидан фойдаланиш режалаштирилмаган.
Зеленскийнинг айтишича, Киев қишки давр учун Вашингтондан ҳар ой 100 тадан Patriot ракетаси етказиб беришни сўраган. Бироқ АҚШ маъқуллаган янги битим доирасидаги таъминот бир неча йилдан сўнг бошланиши мумкин.
Шу сабаб Украина президенти ракеталарни ҳозироқ етказиб беришга чақирган. Унинг таъкидлашича, АҚШ, Европа давлатлари ва бошқа ҳамкорларнинг омборларида етарлича тутувчи ракеталар мавжуд.
Давлат департаменти янги харид Украинанинг ҳаво ҳужумидан мудофаа имкониятларини кучайтиришини билдирган. Ҳозирча эҳтимолий савдога розилик берилган бўлиб, бу ракеталар жўнатилганини англатмайди.
Аввалроқ Зеленский АҚШни ҳамкорлар томонидан пули тўланган ракеталар етказиб берилишини кечиктиришда айблаган эди. У 19 октябрда буни Украинага ёрдамни секинлаштиришга қаратилган сиёсий қарор билан боғлаган.
АҚШ давлат котиби Марко Рубио 20 октябрда таъминотда кечикиш бўлган бўлиши мумкинлигини тан олган. Бироқ у Украинага атайлаб зарар етказишга қаратилган сиёсий кўрсатма бўлганини рад этган.
