14 октябрь куни Олий Мажлис Сенати раиси, Одам савдосига ва мажбурий меҳнатга қарши курашиш миллий комиссияси раиси Танзила Норбоева “Better Cotton Initiative” (BCI) нодавлат нотижорат ташкилоти менежери Рэйчел Бэккет билан учрашди.
Учрашувда Ўзбекистонда мажбурий меҳнатга қарши курашиш борасида амалга оширилган кенг кўламли ишлар натижасида ўзбек пахтасига қўйилган бойкот бекор қилингани, бу ишлаб чиқарилган маҳсулотларни жаҳон бозорига чиқиш имкониятини янада кенгайтиргани алоҳида таъкидланди.
Конструктив ва амалий жиҳатларни қамраб олган мулоқот давомида Ўзбекистон ва “Better Cotton Initiative” ўртасида ҳамкорликни кенгайтириш истиқболлари муҳокама қилинди.
Хусусан, Ўзбекистон пахта кластерларига халқаро стандартларни жорий этиш, уларни тегишлича лицензиялаштириш ҳамда маҳаллий тўқимачилик маҳсулотларига кузатувчанлик тизимини жорий этиш бўйича келишувга эришилди. Бундан ташқари, томонлар BCI ташкилотининг Тошкентдаги ваколатхонасини тез кунларда таъсис этишни келишиб олдилар.
Маълумот ўрнида, BCI “пахта даласидан сотувгача” бўлган бутун ишлаб чиқариш жараёнини сертификатлаш билан шуғулланади. Ташкилотнинг мингдан ортиқ аъзоси бўлиб, улар қаторига H&M, Gap, IKEA, Levi Strauss, Zara, Hugo Boss, Adidas, Puma каби 80 дан зиёд дунёнинг энг йирик брендлари киради.