Бу жамоалар орасида 1-тур доирасида ўтказилган ўйин нафақат гуруҳ босқичидаги энг ёрқин ўйинлардан бири, балки гуруҳ ғолиблиги масаласини ҳал қилган ўйин бўлганди. Ўшанда сентябр эди ва ўшанда Юрген Клопп жамоасидаги инқироз кўлами ҳам, неаполликларнинг ҳақиқий кучи ҳам ҳали бўй кўрсатмаганди.
Ўшандаги 4:1 ҳисоби бутун куз ритмини белгилаб берди. Агар ўшанда «Ливерпул» ўйиннинг фаворити сифатида қаралган бўлса, ҳозир бу жамоалар камида тенг кучли жамоалар сифатида баҳоланди. Бу ҳам бўлса ўйин «Энфилд»да ўтгани учун.
«Наполи» бу ўйинга барча турнирлар доирасидаги 13 ғалабадан иборат серия билан ташриф буюрди ва бунда Хвича Кварацхелиянинг ҳам хизматлари беқиёс. Грузин ҳавбеки Неаполдаги энг севимли футболчига айланмоқда, у шу вақтга қадар барча турнирлар доирасида саккиз гол уриб, саккиз голга узатма берган. Тезлик — фантастик даражада: Италиядаги илк мавсуми стартида Криштиану Роналду, Гонсало Игуаин, Златан Ибраҳимович ва Ромелу Лукаку каби катта футболчилар бундай статистикага эришиш учун кўпроқ ўйин ўтказишганди.
1-турда «Ливерпул»га қарши ўйинда Хвича порлаган ва «Энфилд»да ҳам ундан кўп нарса кутилди. Ҳолбуки Лучано Спаллетти ўз юлдузини эҳтиётлаши ҳам мумкин эди: «Наполи» йирик ҳисобда ютқазмаслиги биринчи ўринни кафолатлаш учун етарли, бу эса мураббийлар штабига етакчиларни захирада қолдириш ҳуқуқини беради. Қолаверса, «Наполи» шанба куни ўзининг асосий таъқибчиси — «Аталанта» меҳмони бўлади. Аммо амалда асосий таркиб майдонга тушди: Кварацхелия ҳам, Осимҳен ҳам, Замбо-Ангисса ва Мерет ҳам. Асосий таркиб футболчиларидан фақат Зелиньски ва Распадори захирада қолдирилди.
Клопп, албатта, жанговар таркибни қўйди. «Ливерпул»да олдинда неаполликларникидан ҳам муҳимроқ ўйин кутмоқда — «Тоттенҳэм»га қарши ўйин, аммо германиялик мутахассисдан «Ноттингҳем Форест» ва «Лидс»га қарши уятли мағлубиятлардан кейин жамоани имкон қадар тезроқ ҳаётга қайтариш талаб этиларди.
Мавзуга оид
Жамоани олдинги ҳолатига қайтариш йўлидаги изланишлар Клоппни бошланғич нуқтага олиб келди. Сўнгги бир ярим ой мобайнида у тактик схемалар билан турли тажрибалар қилди — 4-2-3-1 схемасидан 4-4-2 ва майдон марказидаги ромбгача. Аммо «Наполи» билан ўйинда одатий 4-3-3 схемасига қайтилди ва бу афтидан иш берди. Умуман, Клопп аввалбошдан тажрибаларга қўл урмаслиги керак эди — пасайиш кўп жиҳатдан муҳим футболчиларнинг жароҳат олиши, Маненинг кетиши ва Нуньеснинг мослашуви чўзилиши билан боғлиқ эди. Бундай ҳолатда барчасини вақт даволайди.
4-3-3 схемасида «Ливерпул» ўзига муносиб ўйин кўрсатди. Ҳатто ўзи учун ноодатий чап вингер позициясида тушган Кертис Жонс ҳам ўйиннинг умумий картинасидан четга чиқиб қолмади. Аммо икки дарвоза олдида ҳам голли вазиятлар юзага келавермади. Фақат 29-дақиқага келиб жамоалар илк бор дарвоза соҳасига зарбалар беришди — 30 сония фарқи билан аввалига Тиагу Алькантара, кейин Ндомбеле дарвозабонларни ўйинга қўшилишга мажбур қилди. Лекин булар ўйиннинг биринчи бўлимидаги ягона вазиятлар бўлиб қолди.
Хвича ўйинда йўқолиб қолмади. Фақат унга ҳимоячилар ортига қочиб кетиш учун кенглик етишмади, аммо грузиялик футболчи доимо тўп ҳаракатланган ҳудудларда эди, у кадрларда тез-тез кўзга ташланди. Иккинчи бўлимда эса Кварацхелия ўз магиясини намойиш этди: 53-дақиқада жарима зарбасидан тўпни Эстигорнинг бошига қўндирди, аммо узоқ вақт давомида видеотакрорни кузатишдан кейин ҳакам норвегиялик футболчида сантиметрлик офсайд қайд этиб, голни бекор қилди.
Кейинроқ Кварацхелиянинг ўзи ҳам гол уришга яқин келди — яқин масофадан туриб йўллаган зарбаси Алиссон томонидан бартараф этилди. Аммо бу оқшом меҳнаткаш грузиннинг омади келмади.
«Ливерпул» эса Хвича захирага олиниши билан гол урди. Бу, албатта, ўзаро боғлиқ ҳодисалар эмас, аммо факт шуки — Кварацхелия майдонни тарк этишидан бир ярим дақиқа ўтгач қизиллар бурчак зарбаси ижро этишди ва барибир тўпни рақиб дарвозасига жойлаштиришди. Бу айнан шундай бўлди: Мерет Нуньеснинг бош билан йўллаган зарбасидан кейин тўпни дарвоза чизиғидан олиб чиқди, аммо тўпга биринчи бўлиб етиб келган Салоҳ барибир уни чизиқдан ўтказди-ю. «Наполи» посбони яна тўпни қайтарганди, аммо энди тўп чизиқни кесиб ўтганидан кейин.
«Ливерпул» ғалабали ҳисобни сақлаб қолиш учун ўйнаши етарли эди ва буни уддалади. Қўшимча дақиқалар сўнгида эса навбатдаги бурчак зарбасидан кейин эгизак-гол урилди — аммо бу сафар Мерет дастлаб ван Дейкнинг зарбасини қайтарди, Нуньес эса дарвозани ишғол қилди.
«Наполи»нинг 13 ғалабадан иборат сериясига якун ясалди. Лучано Спаллетти бу мавсумда илк бор мағлубиятга учради. «Ливерпул» яна бир бор ўзининг қайтишига умид берди — шонли йиллардаги каби ўйин билан. Аммо бу уйғониш давом этадими? Жамоани нимчорак финалда қийин синов кутмоқда. Чунки «Ливерпул»га қуръада «Бавария», «Реал», «ПСЖ» ва «Порту» клубларидан бири тушиши мумкин.
Кутилганидек «Рейнжерс»нинг йирик ҳисобдаги ғалабаси рўй бермади ва Европа Лигасига «Аякс» йўл олди. Бунинг акси бўлишига шотланд клубининг ашаддий фанатлари ҳам ишонишмаганди ва Бергҳайс дарвозабонни мазах қилиб, тезкор гол ургач мўъжиза рўй бермаслиги барчага ошкор бўлди. Қолаверса мезбонларнинг собиқ футболчиси Бэйси ҳисоб 0:1 эканида тўпни дарвоза чизиғи устида тўхтатиб қолиб, «Айброкс» трибуналаридаги мухлисларни ранжитди. Бўлимнинг иккинчи ярмида эса Қуддуснинг зарбаси рикошет орқали дарвозага бориб тушгач, барчаси амалда ҳал бўлди.
Умуман, «Рейнжерс»нинг турнир гуруҳ босқичидаги иштироки тўлиқ фиаскога айланди. Биринчидан, бу Шотландия вакили гуруҳда бир очко ҳам ололмагани билан боғлиқ илк ҳолат бўлди. Иккинчидан, 20 дан ортиқ гол ўтказилди ва бунақаси Европа кампанияси учун алоҳида ҳолат. Шотланд клублари бу қадар ёмон натижани 1959/60 йиллар мавсумидан буён қайд этишмаганди ва ўшанда ҳам бу ҳолат айнан «жерслар» билан содир бўлган.
«Порту» даъвогарлик қилиб турган биринчи ўрин плей-оффда қулай рақибни кафолатламайди, шу туфайли бу оқшом юпатувчи Европа Лигаси йўлланмасисиз ҳам қолиш хавфида бўлган «Атлетико»нинг иштиёқи юқорироқ эди. Аммо амалда барчаси бошқача кечди.
«Аждарлар» ҳозирда барқарор ўйнамоқда, ҳеч қандай босим йўқлигида эса бу жамоага ўзи истаган ўйинни қилиш имконини беради. Мезбонлар шундай енгиллик билан ҳаракат қилишдики, «матрасчилар» мудофааси ўйин бошиданоқ боши берк кўчага кириб қолди, ҳолбуки ҳимоявий ўйин ҳамиш Диего Симеоненинг ташриф қоғози саналган. Умидсиз мағлубиятга учралган ўйинда энг яхши футболчи Облак бўлди — бу барчаси қандай бўлганини кўрсатади (мезбонлар зарбалар бўйича 16-11, дарвоза соҳасига аниқ борган зарбалар бўйича 8-5 ҳисобида устунлик қилишди). Торимий бўш дарвозани ишғол этганида буни алоҳида эпизод сифатида қараш мумкин бўлган бўлса, Эуштакиунинг голидан кейин «Атлетико» мухлислари бор эътиборини Леверкузенда содир бўлаётган воқеаларга қаратишига тўғри келди.
Бу ерда эса танаффусга қадар «Байер»ни қаноатлантирувчи голсиз дуранг сақланиб қолди. Шу билан бирга леверкузенликлар иккинчи бўлимда ҳам ўйинни назорат қилишди ва «Брюгге»га хавфли вазиятлар яратиш имконини беришмади. Энди немислар баҳорда иккинчи даражали еврокубокда иштирокини давом эттиради, аввалги турда Мадридда уларнинг омади келиб, дуранг натижа сақланиб қолгани қўл келди. «Атлетико»нинг муваффақиятсизлиги ўша ўйинга қўшиб берилган 9-дақиқада пенальти аниқ ижро этилмагани эмас. Мадрид жамоасида инқироз давом этмоқда, жамоа 2006 йилдан буён илк бор евробаҳорсиз қолди. Ўшанда «Атлетико» шунчаки еврокубокларга йўлланма олмаганди. Энди жамоа мухлислари футболчилар бу жамоа либосини кийиб юришга ҳақли эмаслигини айтишмоқда.
Сешанба оқшомидаги ўйинлар орасида энг яхши афишага эга қарама-қаршилик турнир нуқтайи назаридан ҳеч нарсани ҳал этмасди, чунки қандай натижа қайд этилишидан қатъи назар «Бавария» ва «Интер» мос равишда биринчи ва иккинчи ўринларни сақлаб қоларди. Аммо майдонда қизиқарли воқеалар содир бўлди ва арбитр дебютдаёқ Мане Барелланинг кучли зарбаси қаршисида қўллари билан юзини тўсганида қийин қарор қабул қилишига тўғри келди. Якунда — эпизод барча ракурслардан қараб чиқилганида — пенальти қўйилмади.
«Интер» учун ёқимсиз ҳолатлар давом этди ва Лаутаро Мартинес сирғаниб йиқилганида Павар ҳеч қандай қаршиликсиз ҳисобни очди. Натижада «Бавария» янги клуб рекордини ўрнатди, Чемпионлар лигасида қаторасига 22-уй ўйинида гол урди. Шупо-Мотинг эса шахсий натижасини яхшилашда давом этди, унинг узоқ масофадан дарвоза «тўққизлиги»га йўлланган кучли зарбаси камерунликнинг қаторасига олтинчи ўйинда гол уриши бўлди.
Энди Юлиан Нагельсманнинг Левандовскисиз «Бавария»да ўтган мавсумдагига қараганда голли вазиятлар ва голлар бўлаётгани ҳақидаги кинояси ҳеч кимда шубҳа қолдирмади. Германиянинг энг яхши жамоаси турнир тарихида учинчи мавсум гуруҳ босқичини очко йўқотмай ўтказган илк жамоага айланди.
Хави олдиндан Чехияга Левандовскини олиб кетмаслигини маълум қилганди. Аммо шу куни тажрибали поляк ҳужумчисидан бошқаларга ҳам дам берилди, агар 35 ёшли Пике ва 33 ёшли Жорди Альбани майдонга туширишга тўғри келмаганида, «Барселона»нинг бошланғич таркиби ёши Чемпионлар лигасида тушган энг ёш таркиб бўлиши мумкин эди. Яна бир тажрибали футболчи — Маркос Алонсо — ҳисобни очди, бу гол унинг учун асосий еврокубокдаги илк гол бўлди. Бу унинг «Барса» учун ўйнаган отаси урган голдан 37 йил ўтиб рўй берди.
«Виктория» эса вақти-вақти билан хавфли вазиятлар яратиб турди, аммо ҳадеганда гол ура олмади. Ҳатто бир сафар деярли бўш дарвоза сари йўлланган зарба тўсинга тегди, кўк-анорранглилар эса вазиятлардан фойдаланишда намуна кўрсатишди ва танаффусга чиқиб кетиш арафасида олдинги ўйинларда вазиятларни йўққа чиқариш билан ёдда қолган Ферран Торрес Альбанинг узатмасини голга айлантира олди.
Чехлар иккинчи бўлим бошида пенальтидан урилган голдан хурсандчилик қилишга улгурмасдан уюштирилган жавоб ҳужумида Рафинья ва Торрес комбинацияси учинчи голга олиб келди. Чорининг яна бир голига эса 19 ёшли Пабло Торре жавоб қайтарди, у ҳақда шу кунгача каталонияликларнинг фақат энг ашаддий мухлислари билишарди. Асосий таркибдаги бундай дебютни ёш футболчи бутун ҳаёти давомида ёдда сақлаши тайин.
Энг чигал вазият юзага келган бу гуруҳда тўқнашув ўйиндан олдин бошланди — «Марсел» фанатлари «Тоттенҳэм» футболчилари тўхтаган меҳмонхона олдида мушакбозлик қилишди. «Велодром»даги ўйиннинг биринчи бўлими ўрталарига келиб иккита мажбурий ўзгариш амалга оширилди. Аввалига Самюэл Жиго жароҳат олган Эрик Байини алмаштирди. Кейин эса — Мбемба билан тўқнашувдан кейин юзидан жароҳат олган Сон Хин Мин сафдан чиқди. Корея футболи ЖЧ-2022 арафасида кичик шокни бошдан кечирди.
Антонио Конте одатдагидек ҳиссиётга берилди ва дисквалификация туфайли ўйинни трибунадан кузатишга мажбур бўлди. Бу «шпорлар»га илк зарба эмасди, биринчи бўлимга қўшиб берилган дақиқалар охирида Мбемба боши билан тўпни дарвоза тўрига жойлаштирди ва бу «Марсел»нинг биринчи бўлимдаги устунлигининг мантиқий натижаси эди. Параллел кечаётган учрашувда «Спортинг» «Айнтрахт»га гол урганди ва онлайн режимда «Тоттенҳэм» биринчи бўлим якунларига биринчи ўриндан учинчи ўринга тушиб кетди.
Иккинчи бўлимда вазият ўзгара бошлади, Лангле Перишичнинг жарима нуқтасидан узатган тўпини дарвозага жойлагач, ҳисоб тенглашди. Деярли шу вақтда Лиссабонда «Айнтрахт» ҳам жавоб қайтарди, совуққон япониялик Камада пенальтини аниқ ижро этди, «Спортинг» мухлислари лазерли кўрсаткичлар билан уни хато қилишга мажбурлашга уринишлари фойда бермади. Бундан ўн дақиқа ўтиб Коло Муани немисларни олдинга олиб чиқди ва Франкфурт кўчаларида байрам бошланиб кетди.
They put a laser in his eye but he just laughed at them and scored. He got that dawg in him 🥶🥶 pic.twitter.com/U8Io0bqhtb
«Велодром»даги ўйин охири эса асаблар жангига айланди, Ҳёйбергнинг зарбаси тўсинга тегди, марселликлар ҳимоячиси Колашинац бир неча метрдан туриб гол ура олмади. Ҳёйберг ўйинга қўшиб берилган бешинчи дақиқада ўз мақсадига эришди ва «Марсел»ни евробаҳорсиз қолдирди, «Спортинг» иккинчи ўринни «Айнтрахт»га бой бериб, Европа Лигасига йўл оладиган бўлди.
