Британия ҳарбий разведкасининг ҳисоботи «Вагнер»га бағишланди

Таҳлилчиларнинг таъкидлашича, сўнгги икки ой ичида Пригожин хусусий ҳарбий компания билан алоқадорлигини яширишни тўхтатган ва ўзининг оммавий баёнотларида янада очиқроқ бўлган. 

«Эҳтимол, у катта босим остида қолган Россия миллий хавфсизлик тизимидаги обрўсини оширишга ҳаракат қилмоқда», - дея хулоса қилди Британия разведкаси.

Аввалроқ Британиянинг McCue Jury & Partners юридик фирмаси урушдан жабр кўрган украиналиклар номидан Евгений Пригожин ва «вагнерчилар»га қарши судга мурожаат қилаётгани хабар берилганди. 

Британиянинг McCue Jury & Partners юридик фирмаси россиялик тадбиркор Евгений Пригожин ва у асос солган хусусий ҳарбий компания (ХҲК) - «Вагнер»ни урушдан жабрланган украиналиклар номидан судга беради. Бу ҳақда 1 ноябрь, сешанба куни ташкилот сайтида чоп этилган баёнотда айтилади. 

Фирманинг таъкидлашича, у «дунёдаги етакчи экспертлар коалицияси билан кенгроқ фуқаролик жамияти ҳуқуқий кампанияси» доирасида иш олиб бормоқда. Баёнотда қайд этилишича, адвокатлар Пригожин ва «Вагнер»га огоҳлантириш юборишган. 

Ҳуқуқшуносларнинг фикрича, бу ҳолат дунёнинг бундай ташкилотлардан «ўзларидан ажралиб, халқаро жиноятларидан яширинишга уринаётган» режимлар учун воситачи сифатида фойдаланишга муносабатини ўзгартириши мумкин. 

«Вагнер» ХҲКнинг ёлланма аскарлари кўп йиллар давомида Кремль томонидаги турли қуролли можароларда яширин иштирок этганликда гумон қилинмоқда. Москва ҳар доим хусусий ҳарбийлаштирилган гуруҳлар билан алоқаларини рад этиб келади. 

Шу билан бирга, Россия президенти Владимир Путин билан яқин алоқадор ҳисобланган Евгений Пригожин сентябр охирида «Вагнер» ХҲК асосчиси эканлигини тан олди. Унинг сўзларига кўра, у 2014 йилнинг май ойида Донбасс айирмачиларини қўллаб-қувватлаш учун ҳарбийлаштирилган тузилмани яратган. 

Октябрь ойида Лондонда жойлашган Middle East Eye нашри номи ошкор этилмаган манбаларга таяниб, Украинадаги йўқотишлар туфайли «Вагнер» ХҲК Туркия, Сербия, Чехия, Полша, Венгрия, Германия, Молдова, Канада ва Лотин Америкаси мамлакатларида аскарларни ёллаш бўйича саъй-ҳаракатларни кучайтирганини хабар қилди.