Путиннинг ошпази Пригожин уруш даврида Россиядаги энг машҳур одамга айланди. Унинг уруш тарафдорлари орасидаги машҳурлигига ҳар қандай ҳарбий қўмондон, ҳатто президент Путин ҳавас қилса ҳам арзирди. Ахир Пригожин хусусий армияси билан бутун бошли шаҳарни эгаллаб олганда уни кўчаларда олқиш билан кутиб олишди. «Вагнер» асосчиси бемалол Герасимов ва Шойгу урушни бошқарган штабга бостириб бориб, генералларга буйруқ берган, бунинг барчасини видеога олиб кўрсатганди.
«Адолат марши» деб аталган бу юриш «Вагнер» жангчилари Москвага яқинлашганда тўхтаган ва Александр Лукашенко воситачилигидаги музокараларда Пригожин ўз армиясини Беларусга олиб чиқишга рози бўлганди. Охир-оқибат Путинга қарши кўтарилган исён Пригожин учун аянчли тугади ва уруш давридаги Россиянинг энг машҳур инсони сирли тарзда ғойиб бўлди.
Ҳалокат
2023 йил 23 август тунда Embraer Lagacy 600 хусусий самолёти Твер области Бологов райони Куженкино қишлоғи яқинида қулаб тушади. Бортдаги ўн кишининг ҳаммаси ўлади. Ҳалок бўлганлар «Вагнер» асосчиси Евгений Пригожин, ҳарбий номи «Вагнер» бўлган қўмондон Дмитрий Уткин (гуруҳ номи унинг чақирув номидан олинган), Пригожиннинг ёрдамчиси Валерий Чкалов, гуруҳга алоқадор Сергей Пропустин, Евгений Макарян, Александр Тотмин, Николай Матусеев ва уч нафар экипаж аъзоси эди.
Ҳалокат содир бўлганидан сўнг самолётда Пригожин бўлганми-йўқми деган савол кун тартибига чиқди. Росавиация тадбиркор самолётда бўлганини тасдиқлайди. Турли манбалар Пригожин аввал ҳам шу самолётдан фойдаланиб келганини ёзиб чиқди. Самолёт Москвадан Петербургга учаётган бўлган.
Путиннинг реакцияси
Пригожиннинг самолёти ҳалокатга учраганидан бироз ўтиб Путин Курск жангининг 80 йиллигига бағишланган байрам тадбирига ташриф буюради. Маросим жонли тарзда эфирга узатилади ва Путин Россия қаҳрамони унвонини олган ҳарбийларни мукофотлайди.
Путин Пригожиннинг ўлими ҳақида илк марта ҳалокатдан бир ой ўтиб, Кремлда «ДХР» раҳбари Денис Пушилин билан учрашув чоғида гапиради. Қурбонлар орасида Россиянинг Украинага қарши урушида «улкан ҳисса қўшган» хусусий ҳарбий компания ходимлари ҳам бўлганини эътироф этиб, Пригожин «керакли натижага эришадиган, мураккаб тақдирли инсон бўлганини» айтганди.
«Пригожинни 90-йиллардан бери биламан. У мураккаб тақдирли инсон эди, ҳаётда жиддий хатолари ҳам бўлди. Керакли натижаларга ҳам эришди, умумий иш учун ҳам. У истеъдодли инсон ва тадбиркор эди», деганди Путин.
