6 сентябр куни e-auksion платформасида ўтказилган савдода Пискент тумани ҳокими Раҳимжон Рихсиев ғолиб чиқиб, Оҳангарон туманидаги салкам 400 гектар яйловни қарийб 1 трлн сўмга 30 йилга ижарага олган олган эди.
Бу харид ижтимоий тармоқларда танқидга учраганидан кейин Рихсиев видеомурожаат билан чиқиб, ерни ижарага олиш ниятида бўлмагани, онлайн аукцион тизимининг ишлашини ўз кўзи билан кўриш учун тажриба тариқасида шундай қилганини айтганди.
Тошкент вилояти ҳокимлиги бугун, 3 ноябр куни берган расмий ахборотга кўра, Пискент туман ҳокими ўз хатти-ҳаракатлари юзасидан вилоят ҳокимига ёзма равишда тушунтириш берган. Таъкидланишича, Раҳимжон Рихсиев бу аукционда қатнашиб, ғолиб бўлиб тадбиркорлик фаолияти билан шуғулланиш ниятида бўлмаган; E-auksion тизимидаги айрим камчиликларни аниқлаш мақсадида, мустақил равишда шундай йўл тутган.
“Унга ўз фаолиятида дуч келаётган ноаниқлик ёки бошқа муаммоларни юқори турувчи ташкилотлар, тегишли идоралар билан биргаликда музокара, мулоқот шаклида, расмий каналлар орқали ҳал этиш лозимлиги уқтирилди.
Қўшимча қилиб айтамизки, айни пайтда аукционда ижарага қўйилган ерларнинг савдоси бўйича юзага келаётган муаммолар, мавжуд камчиликлар ва уларни бартараф этиш бўйича ўрганишлар бошланган. Бу ҳақда кейинроқ қўшимча ахборот берилади”, – дейилади вилоят ҳокимлиги ахборотида.
Эслатиб ўтамиз, гарчи Рихсиев ўз видеомурожаатида олдин тадбиркор бўлгани, лекин ҳозир бу иш билан шуғулланмаётганини, қолаверса, чорвачилик у учун бегона соҳа эканини айтган бўлса ҳам, у мазкур хариддан бир ҳафта ўтиб янги агрокорхона очгани маълум бўлганди.
У 13 сентябр куни Пискент шаҳрида рўйхатдан ўтказган ва 100 фоиз таъсисчиси ўзи бўлган “Animals Service” МЧЖнинг фаолият тури сифатида “аралаш қишлоқ хўжалиги” кўрсатилган.
Тошкент вилояти ҳокимлиги матбуот хизмати Kun.uz'гa "Animals Service" Пискент тумани ҳокимига тегишли эканини тасдиқлаб, ҳокимларнинг тадбиркорлик фаолияти билан шуғулланишини чекловчи “Давлат фуқаролик хизмати тўғрисида”ги қонун ҳали кучга кирмаганини билдирганди.
