CIES эълон қилган тарбияловчи клубларнинг йиллик рейтингида Лиссабон шаҳри клуби худди 2025 йилдаги каби 101,3 балл кўрсаткич билан биринчи ўринни эгаллади.
CIES услубиётига кўра, клубларнинг ўрни айни пайтда уларнинг нечта тарбияланувчиси профессионал клубларнинг асосий жамоаларида тўп тепаётганига қараб белгиланади (бунда биратўла 49 та мамлакат чемпионати инобатга олинади).
Шу билан бирга, клуб у ёки бу футболчини тарбиялаган деб ҳисобланиши учун, ўйинчи 15 ёшдан 21 ёшгача бўлган даврда ушбу клубнинг асосий жамоасида камида уч мавсум ўтказган бўлиши шарт. Қўшимча баллар академия битирувчиси ўйнаётган клуб савияси, у иштирок этган ўйинлар даражаси, майдонда ўтказган вақти ва ёшига (қанча ёш бўлса, шунча яхши) қараб берилади.
Ушбу ҳисоблаш услубиётига кўра, «Бенфика» тарбияланувчилари сони 93 нафарни ташкил этди. Ҳозир улардан фақат тўрт нафаригина Лиссабон жамоасида тўп тепмоқда. Яна 14 нафари «катта бешлик» (Англия, Испания, Германия, Италия, Франция) чемпионатлари клубларида, қолганлари эса нисбатан оддийроқ жамоаларда ўйнамоқда.
Эътиборлиси, иккинчи ва учинчи ўринларни эгаллаган Аргентинанинг «Ривер Плейт» ва «Бока Хуниорс» клубларида ҳисобга олиш қоидаларига мос келувчи тоифадаги тарбияланувчилар сони «Бенфика»никидан кўп ёки у билан тенг: «Ривер Плейт»да 94 нафар ва «Бока Хуниорс»да 93 нафар. Бироқ Аргентина грандлари академияларининг битирувчилари топ-клубларда камроқ экани сабабли («катта бешлик» жамоаларида 10 нафардан ўйинчи), уларга камроқ — мос равишда 97,6 ва 96,7 балл берилди.
Юқори ўнталикдан жой олган клублар орасида «Велес» (Аргентина), «Аякс» (Нидерландия), «Барселона» (Испания), «Спортинг» (Португалия), «Дефенсор» (Уругвай), «Реал Мадрид» (Испания) ва «Црвена Звезда» (Сербия) бор.
