Депутат Расул Кушербаевнинг ваколати расман тугатилди

Марказий сайлов комиссияси депутат Расул Кушербаевнинг депутатлик ваколатини муддатидан олдин тугатди.

Расул Кушербаев / Фото: Kun.uz

Марказий Сайлов комиссияси Олий Мажлис Қонунчилик палатаси депутати Расул Кушербаевнинг ваколатларини муддатдан олдин тугатиш масаласини кўриб чиқди. Комиссия аъзолари бир овоздан унинг мандатини тугатишни қўллаб-қувватлади.

Аввалроқ, Расул Кушербаев ўз Telegram-каналида мандатини топширмоқчи экани ҳақида ёзганди.

«Депутатлик фаолиятимни якунлашга қарор қилдим. Бундай ишлай олмас эканман. Бунга мажбур бўлганимдан афсусдаман. Ишонч билдирган, қўллаб-қувватлаган барчага раҳмат! Розинг бўлинглар! Насиб қилса қолганини вақт кўрсатади. Аллоҳ мададкор бўлсин!» - деганди депутат.

Расул Кушербаевнинг бундай қарорга келишига Қонунчилик палатаси спикери ўринбосари Улуғбек Иноятов унга бюджет лойиҳаси муҳокамаларида очиқчасига сўз бермагани сабаб бўлган бўлиши мумкин.