Париж суди канадалик профессорга 1980 йилдаги теракт учун сиртдан ҳукм чиқарди

Париж суди Оттава университети профессори, асли келиб чиқиши ливанлик бўлган 69 ёшли Канада фуқароси Ҳасан Диабни 1980 йил 3 октябрда Париж синагогасида юз берган портлашда айбдор деб топиб, сиртдан умрбод қамоқ жазосига ҳукм қилди. Бу ҳақда 21 апрел, жума куни Канаданинг CBC телеканали ўз сайтида хабар берди.

Тергов маълумотларига кўра, Диаб синагогага кираверишда бомба қўйган. Портлаш бинода 300 га яқин одам келганида содир бўлган. Ҳужум натижасида тўрт киши ҳаётдан кўз юмган – уч нафар француз ва бир исроиллик, яна 47 нафар одам яраланган. Бу ҳужум Францияда Иккинчи жаҳон урушидан кейин содир бўлган биринчи йирик антисемит ҳужуми бўлган, деб ҳисобланади. 

Ҳукм эълон қилинганидан кейин Оттавада журналистлар билан суҳбатда Диаб вазиятни "кафкианча" деб таърифлади. Профессор адвокатларининг таъкидлашича, у ҳодиса вақтида Ливанда бўлган ва хато туфайли шубҳа остига тушган.

Германиянинг dpa агентлиги қайд этишича, Францияда Ҳасан Диабни экстрадиция қилиш талаби билан боғлиқ муаммолар юзага келиши мумкин. 2008 йилда у худди шу иш бўйича Франция илтимосига биноан Канадада ҳибсга олинган ва 2014 йилда Францияга экстрадиция қилинган. Диаб у ерда 2018 йилнинг бошигача қамоқда эди, ўшанда икки француз судяси далиллар йўқлиги сабабли уни озод қилиш ҳақида буйруқ берган. Канадалик ҳеч қачон расман айбланмаган.