Бошланғич синф ўқувчиларига планшетлар тарқатилади

Сайловолди дастурининг таълимга оид бандида таъкидланганидек, Хоразм боғчаларида компьютер синфларини ташкил қилиш, бошланғич синф ўқувчиларига планшет тарқатиш бошланади, дея хабар қилмоқда Kun.uz мухбири.

“Хоразмнинг “ташриф қоғози” IT бўлади. Аввало, “мактаб – олийгоҳ – IT компанияси”дан иборат яхлит IT таълим ва хизматлар занжири яратилади”, деди Мирзиёев. Бунинг учун, вилоятда етти йилга мўлжалланган, рақамлаштириш соҳасида “Муҳаммад ал-Хоразмий ворислари” деб номланган лойиҳага старт берилади.

Боғчаларда компьютер синфларини ташкил қилиш, бошланғич синф ўқувчиларига планшет тарқатишнинг биринчи босқичида Хоразм вилоятдаги 543 та мактабдан 110 таси танлаб олиниб, бошланғич синф ўқувчиларига “ноутбук” олиб берилади.

Шунингдек:

• юқори синфларда дастурлаш, веб-дизайн каби соҳалар касб сифатида ўқитилади;
• Хоразмнинг барча боғча ва мактаблари фильтрланган ичимлик суви билан тўлиқ таъминланади;
• 2030 йилга қадар мактабгача таълимга бўлган эҳтиёж тўлиқ қопланади ва қамров ҳозирги 79 фоиздан 100 фоизга етказилади;
• қарийб 2 триллион сўм маблағ ҳисобига 500 га яқин янги боғчалар ташкил этилади.

Шунингдек, келгуси етти йилда замонавий мактаблар барпо этиш, мавжудларининг қувватини ошириш ҳисобига қўшимча 90 минг ўқувчи ўрни яратилади. Натижада, вилоятда ўқувчиси 30 нафардан кўп бўлган синфлар қолмайди, деб таъкидлади номзод (ҳозирда 2 мингдан зиёд синфда 35 та ва ундан кўп бола ўқийди).