«Парижда бўлиб ўтадиган олимпия ўйинларида ҳам юксак чўққиларни забт этишингизга ишонаман». Президент спортчиларга табрик йўллади  

Осиё қитъасининг 45 та давлатидан 11 минг нафар спортчи иштирок этган бу мусобақаларда миллий жамоа аъзолари 22 та олтин, 18 та кумуш ва 31 та бронза медалини қўлга киритди.

Олтин медаллар 31 нафар спортчи томонидан қўлга киритилган бўлса, уларнинг тенг ярми – қизлар ҳиссасига тўғри келган.

132 нафар вакил жами 71 та медални қўлга киритиб, ўтган Осиё ўйинларига нисбатан рекорд натижани қайд этган.

“Айниқса, ғайрат-шижоатли ўғил-қизларимиз Хитой Тайпейи, Баҳрайн, Шимолий Корея, Ҳонгконг, Эрон, Индонезия, Қозоғистон, Қатар, Сингапур, Малайзия, Ветнам, Кувайт каби спорт соҳасида ривожланган давлатларни ортда қолдириб, умумжамоа ҳисобида Хитой, Япония, Жанубий Корея ва Ҳиндистондан кейин фахрли бешинчи ўринни эгаллагани Ўзбекистон спорти тарихида яна бир ёрқин саҳифа очди, десак, ҳақиқатни айтган бўламиз. 

Бўлиб ўтган қизғин беллашувларда юртимиз шарафини муносиб ҳимоя қилган Баҳодир Жалолов, Жалгасбай Бердимуратов, Улуғбек Рашитов, Ҳасанбой Дўсматов, Абдумалик Халаков, Диёра Келдиёрова, Тахмина Икромова, Севинч Раҳимова, Вилана Савадян, Эвелина Аталянц, Шарифа Давронова, Сафина Саъдуллаева, Музаффар Тўрабоев, Ольга Забелинская, Шоҳмурод Холмуродов, Нурислом Тўхтасин ўғли, Умид Эсонов, Артём Штурбабин, Ҳилола Ортиқбоева, Муҳсин Ҳисомиддинов, Зайнаб Дайибекова, Плиего Лара Мария Паола, Херрера Лара Луиза Фернанда, Гулистон Пердебаева, Анна Пракатень, Шеҳроз Ҳакимов, Дилшоджон Худойбердиев, Давиржон Давронов, Алишер Турдиев, Муроджон Йўлдошев ва бошқа спортчиларимизнинг нодир истеъдоди, маҳорати ва қобилиятига барча спорт мухлислари яна бир бор тан берди.

Ўзбек қиличбозлик спортининг ифтихорига айланган Зайнаб Дайибекова сабля жамоа дастурида Осиё қитъасида тенгсизлигини, Анвар Клевлеев эса слаломда эшкак эшиш беллашувида аксарият рақибларидан кучли эканини амалда намоён этдилар.

Айни вақтда навқирон фарзандларимиз кураш, дзюдо, бокс, енгил атлетика, бадиий гимнастика бўйича тенгсиз, таэквондо, велоспорт, оғир атлетика, футбол мусобақаларида эса етакчилар сафида эканини амалда исботлади.

Осиё ўйинларида эришилган бундай ютуқлар биз учун улкан аҳамиятга эга бўлиб, сизлар шу тариқа миллий спорт мактабимизнинг шон-шуҳратини, Ўзбекистон ёшларининг қандай буюк ишларга қодир эканини жаҳонга намоён этдингиз. 

Ўз навбатида 2024 йил Парижда бўлиб ўтадиган 33-олимпия ўйинларида ҳам юксак чўққиларни забт этишингизга ишонаман!” - дейилади табрикда.

Президент спортчи ёшларни тарбиялаб камолга етказган ота-оналарига, моҳир ва жонкуяр устоз-мураббийларига ўз номидан, халқ номидан ташаккур изҳор этган.

“Йирик халқаро спорт беллашуви – Осиё ўйинларида қўлга киритган тарихий натижаларингиз билан сизларни яна бир бор самимий қутлаб, барчангизга сиҳат-саломатлик, келгуси фаолиятингизда янги-янги зафарлар, оилаларингизга бахт-у саодат тилайман”, дейилади табрик матнида.