Самарқандда тадбиркорнинг электрдан қарздорлигини камайтириб бермоқчи бўлган ЭТК муҳандиси ушланди

Бош прокуратура ҳузуридаги департаментнинг Ургут туман бўлими ва ДХХ ходимлари ҳамкорликда тадбиркорлик субъектларининг ҳуқуқларини ҳимоя қилиш юзасидан тезкор тадбир ўтказилган.

Тезкор тадбирда туман ЭТК корхонаси муҳандиси А.Н. ва фуқаро З.Ж. тадбиркор А.А.нинг ишончига кириб, ошхонанинг электрдан 35,9 млн сўм қарздорлигини камайтириб бериш эвазига 15 млн сўм олган вақтларида ашёвий далиллар билан ушланган.

Қайд этилишича, мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.

ЭТК ходимлари томонидан тадбиркорларнинг электр энергиясидан бўлган йирик миқдордаги қарздорликларини ўчириб бериш учун пул олиш ҳолатлари тез-тез учраб туради.

Жумладан, Сайхунобод тумани ЭТК бошлиғи ўринбосари Ғ.Н. “С.Х.” МЧЖга қарашли ошхонада ўтказилган текширишда аниқланган 21 млн сўм зарарни базага киритмаслик эвазига МЧЖ раҳбари Ш.дан 7 млн сўм пора талаб қилиб, шундан 1 млн сўмни олган. Қолган 6 млн сўмни Сайхунобод туман ЭТК маъмурий биносида (!) олган вақтида ашёвий далиллар билан ушланганди.

Жиззах шаҳар ЭТК бўлим назоратчиси С.Э. “I.S.” МЧЖ раҳбарига ишлаб чиқариш цехини электр энергиясига улаб бериш ва келгусида унинг фаолиятига раҳнамолик қилиб туриш эвазига жорий йилнинг май-июл ойларида 400 доллар ва 2 млн сўмини қўлга киритиб, яна 3 млн сўмни олган вақтида ашёвий далиллар билан ушланганди.

Янгиҳаёт туман ЭТК юрисконсульти Ф.И. фуқаро Б.нинг электр энергия истеъмолидан вужудга келган 9 млн сўм қарздорлигини судда ишловчи танишлари орқали камайтириб беришни ваъда қилган.

Юрисконсульт бунинг эвазига фуқародан 100 АҚШ доллари ва 500 минг сўмни ЭТК маъмурий биноси олдида (!) олган вақтида ашёвий далиллар билан ушланганди.

П.С. Катта эҳтимол билан қўлга тушмаганлари салмоқли пуллар эвазига миллионлаб сўмни ташкил этадиган қарзларни ўчириб ҳам беришяпти.