24 октябр куни Самарқандда бўлиб ўтган «C5+1» форматидаги (Марказий Осиё мамлакатлари + АҚШ) минтақавий ҳамкорлик бўйича биринчи вазирлар учрашуви якунида АҚШ Халқаро тараққиёт агентлиги (USAID)нинг минтақада амалга оширмоқчи бўлган янги лойиҳалари эълон қилинди.
Йиғилиш якунлари бўйича ўтказилган матбуот анжуманида USAID раҳбари Саманта Пауэр 14,3 миллион доллар ажратилишини эълон қилди, бу маблағ Марказий Осиёда иқтисодий ўсиш йўлидаги тўсиқларни бартараф этиш, барқарор ва «яшил» энергия тизимларини яратиш ҳамда дезинформацияга қарши курашиш учун сарфланади.
Байденнинг топшириғига кўра
«АҚШ Марказий Осиё давлатлари мустақиллигини биринчилардан бўлиб тан олган. Ўшанда президент Жорж Буш «Бугун дунё янги умидлар ва имкониятлар қаршисида турибди», дегани ёдимда. Ўшандан буён Марказий Осиё халқларига ёрдам беришга ҳаракат қилиб келамиз. Соғлиқни сақлаш, таълим соҳасида, даромадларини ошириш масалаларида бирга лойиҳалар амалга оширяпмиз», деб сўз бошлади АҚШ федерал агентлиги раҳбари.
Унинг сўзларига кўра, Ўзбекистонга АҚШ президенти Жо Байденнинг топшириғи билан келган.
«Президент Байден яқинда минтақа раҳбарлари билан учрашганда «Бу тарихий имконият даври» деб айтди. Мен бу ерга президент Байденнинг топшириғи билан келдим, муносабатларимиз ривожланиб бораётганини таъкидлаш керак. Минтақа аҳолисининг аксар қисмини ёшлар ташкил қилади ва улар дунё билан интеграция қилиши, алоқаларимизнинг ижобий самарасини кўриши лозим.
Биз иқтисодий ўсиш, дезинформацияга қарши кураш, трансчегаравий савдодаги тўсиқларни бартараф қилиш, ёшлар, аёллар бошқарадиган бизнесларга ёрдам бериш каби дастурларда иштирок этишга тайёрмиз. Бундан ташқари, АҚШ минтақа қайта тикланадиган энергияга ўтишини қўллайди. Масалан, Қозоғистонда шундай лойиҳага ёрдам берганмиз. Минтақадаги яшил энергия лойиҳаларини ривожлантириш учун қўшимча 2 миллион доллар ажратамиз. Энергия тежайдиган технологияларга пул ажратиш бу йўналишда айниқса муҳим», дея USAID раҳбарининг сўзларини келтирмоқда мухбири.
Дезинформацияга қарши кураш
Саманта Пауэр минтақа инвесторларни жалб қилиш учун дезинформациядан холи бўлиши кераклигини айтиб, АҚШ бу борада Ўзбекистон ва бошқа Марказий Осиё давлатларига ёрдам беришга тайёрлигини таъкидлади.
«Дезинформацияга қарши кураш ҳам муҳим ҳисобланади. Масалан, мамлакатга келадиган инвестор унинг бизнесини дезинформация ёрдамида йўққа чиқармасликларига ишончи комил бўлгиси келади. Бу борада журналистларга ёрдам бериш керак. ОАВнинг потенциалини ошириш учун керакли техника ва дастурлар тақдим этишга тайёрмиз», деди Саманта Пауэр хоним.
