Ўзбекистонлик мутахассислар Афғонистондаги темирйўлни таъмирлаб беради

Ўзбекистон ва Афғонистон темирйўл ширкатлари раҳбарлари Ҳайратон – Наибобод – Мозори Шариф темирйўлининг бир қисмини таъмирлаш ҳақида келишиб олди.

Фото: Ўзбекистон темирйўллари

2023 йилнинг 8 ноябр куни Афғонистоннинг Балх вилояти Ҳайратон шаҳрида «Ўзбекистон темирйўллари» бошқаруви раиси Зуфар Нарзуллаев ва Афғонистон темирйўллари бошқармаси бошлиғи Бахт-ар-Раҳмон Шарафат ўртасида учрашув бўлиб ўтди.

Музокараларнинг асосий мавзулари темирйўлнинг Ҳайратон – Наибобод – Мозори-Шариф қисмини реконструкция қилиш билан боғлиқ бўлди. Иккала томон ҳам ушбу участкасини ривожлантириш ва модернизация қилишдан манфаатдорлигини билдирган.

Томонлар «Ўзбекистон темирйўллари» мутахассислари томонидан амалга ошириладиган Ҳайратон – Наибобод – Мозори-Шариф участкасида қурилиш ишларини эрта бошлаш тўғрисида келишувга эришди.

Иккала томон ҳам темирйўл транспорти соҳасида янада ҳамкорлик ва ўзаро манфаатли ҳамкорликка умид билдирган. Ушбу ҳамкорлик минтақанинг транспорт инфратузилмасини яхшилашга ҳамда Афғонистон ва Ўзбекистонда савдо ва иқтисодиётни ривожлантириш учун қулай шарт-шароитлар яратишга хизмат қилади.