Исроил ҲАМАС ҳаракатини молиялаштириб келган – Боррел

Европа Иттифоқи ташқи ишлар ва хавфсизлик сиёсати олий вакили Жозеп Боррел Исроилни ўз рақибини қўллаб-қувватлаб келганликда айблади.

Фото: AFP

Исроил давлати Фаластин маъмуриятини заифлаштириш мақсадида ҲАМАС ҳаракатини яратиш жараёнини молиялаштирган. Бу ҳақда Европа Иттифоқи ташқи ишлар ва хавфсизлик сиёсати олий вакили Жозеп Боррел баёнот берди. Унинг сўзларини Times of Israel келтирди.

«Исроил ҳукумати ФАТҲ етакчилигидаги Фаластин маъмуриятини заифлаштириш мақсадида ҲАМАС ҳаракатини молиялаштирган», деди Боррел Валядолид университетида қилган чиқишида. Сиёсатчи бундай молиялаштириш тафсилотларига аниқлик киритмади.

Нашрнинг қайд этишича, Исроил бош вазири Бинямин Нетаняҳу ўзининг сиёсий рақиблари ва айрим оммавий ахборот воситаларининг ўз ҳукумати узоқ йиллар давомида Ғазо секторида ҲАМАС ҳаракатини фаол қўллаб-қувватлаб келгани ҳақидаги айбловларини рад этади.

Тайёрлаган Сардор Юсупов

#Исроил #Ҳамас #Ғазо

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.