«Медиазона» нашри Россия Федерацияси ички ишлар вазирлигининг федерал қидирув базасида машҳур ёзувчига нисбатан қидирув карточкасини аниқлади.
Ёзувчи Борис Акунин (Григорий Чхартишвили) Россия ички ишлар вазирлигининг федерал қидирув базасидаги рўйхатга қўшилди. Буни «Медиазона» 26 январ, жума куни аниқлади. 2014 йилдан бери Акунин Лондонда яшайди. У Россия ҳукумати ва шахсан президент Путиннинг сиёсатини бир неча бор танқид қилиб, Қримдаги ҳолат ва Украинадаги урушни очиқ қоралаган.
Россиянинг Украинага қарши уруши бошланганидан кейин Акунин асарлари Россия Федерациясида кучли цензура босимига дучор бўлди. Унинг пьесалари асосидаги спектакллар афишаларидан номи олиб ташланди ва баъзи театрлар бундай спектаклларни бекор қилди. 2023 йил декабр ойи ўрталарида АСТ нашриёти ёзувчининг китобларини тарқатишни тўхтатаётганини билдирди. «Читай-город - Буквоед» дўконлар тармоғида ҳам савдо тўхтади. Хавфсизлик кучлари Акунин китобларини нашр этувчи Москвадаги «Захаров» нашриётида тинтув ўтказиш учун келди.
Росфинмониторинг 18 декабр куни ёзувчи Борис Акунинни «террорчилар ва экстремистлар» рўйхатига киритди. Кўп ўтмай, тергов қўмитаси ёзувчига нисбатан Россия қуролли кучлари ҳақидаги «фейклар» ва терроризмни омма олдида оқлаш ҳақидаги моддалар бўйича жиноий иш қўзғатилганини эълон қилди.
Акунин «экстремистлар» рўйхатига киритилганидан кейин «чет эл агенти» деб эълон қилинди
12 январ куни Россия Федерацияси адлия вазирлиги Борис Акунинни «чет эл агентлари» реестрига киритди. Ундан ташқари, янгиланган рўйхатга Moscow Calling Telegram-канали муаллифи Андрей Куршин, «Новая газета» журналисти Александр Минкин ва Мари Эл республикасидан собиқ муниципал депутат Антон Соколов кирди.
Идора, шунингдек, Минкиндан ташқари ҳамма «Россия Федерацияси ва унинг қуролли кучлари ҳақида салбий имидж яратишга қаратилган ёлғон маълумотларни тарқатгани»ни билдирди. Хусусан, Акунин бўйича Адлия вазирлиги ёзувчи «Украина қуролли кучларини қўллаб-қувватлаш учун маблағ йиғиш тадбирларида қатнашган» деб таъкидлади.
Борис Акунин ўзининг «чет эл агентлари» реестрига киритилганидан ҳайратда эканини айтди. «Улар бугун мени чет эл агенти деб эълон қилишди, деб ёзишмоқда. Мен террорчи ва экстремистманми?! Мен ўзимни нотўғри парковка учун жарима ёзилган бин Лодиндек ҳис қиляпман», - деб ёзди у ўшанда Telegram-каналида.
