Украина Си Жинпингни Швейцариядаги тинчлик саммитига таклиф қилди

ХХРнинг Швейцарияда ўтказилиши режалаштирилган форумдаги иштироки Киев учун жуда муҳим бўлади, деди Reuters агентлигига Украина президенти девонхонаси раҳбари ўринбосари Игор Жовква.

Киев Хитой раҳбари Си Жинпингни глобал тинчлик саммити - Украинадаги вазиятни тинч йўл билан тартибга солиш бўйича 5-конференция деб аталмиш анжуманда иштирок этишга таклиф қилди. Бу ҳақда 26 январ, жума куни Украина президенти девони раҳбари ўринбосари Игор Жовква Reuters агентлигига берган интервюсида айтиб ўтди. Пекиннинг Швейцарияда ўтказилиши режалаштирилган ушбу форумдаги иштироки Киев учун жуда муҳим бўлади, деди Жовква. Унинг сўзларига кўра, Украина Хитой томони билан ишламоқда, шунингдек, бўлажак конференциянинг аҳамиятини ХХРга етказиш учун халқаро ҳамкорларни жалб қилмоқда. 

Хитой ҳозирча Украинадаги Россия қўшинларининг ҳаракатларини танқид қилишдан ўзини тийиб келмоқда. 2023 йил 24 февралда эълон қилинган «тинчлик режаси»да Пекин содир бўлаётган воқеаларни уруш деб атамади ва Россия Федерациясини Украина ҳудудидан қўшинларини олиб чиқишга чақирмади, фақат барча мамлакатлар суверенитетини ҳурмат қилиш, тинчлик музокараларини давом эттириш ва ҳарбий ҳаракатларни тўхтатиш зарурлигини таъкидлади. 

Украина бўйича бешинчи тинчлик конференцияси 

Украина бўйича бешинчи тинчлик саммити Швейцарияда ташкил этилишини икки давлат президентлари Володимир Зеленский ва Виола Амҳерд январ ўрталарида эълон қилган эди. Форум 2023 йилда Дания, Саудия Арабистони ва Малтада ҳамда 2024 йил 14 январда Давосда бўлиб ўтган Украинадаги вазиятни тинч йўл билан тартибга солиш бўйича тўртта конференцияга ўхшаш форматда ўтказилади. Украина ва Швейцария учрашувга ҳозирданоқ тайёргарликни бошлаб юборган, бироқ тадбир санаси ва унинг иштирокчилари рўйхати каби қатор тафсилотлар ҳозирча келишиб олинмаган. 

Киев Россияни учрашувга таклиф қилиш ниятида эмаслигини очиқ билдирди. Шу билан бирга, Швейцария президенти Россиянинг Украина бўйича тинчлик саммитида иштирок этишини кутмаяпти, лекин Москвасиз давлат вакилларининг учрашуви «ҳақиқий тинчлик музокараларига айланиши даргумон» эканлигини тан олди. Берн Москва билан алоқаларни тўхтатмайди, деди Амҳерд.