Тошкентда ёғган қор ҳаво сифатини яхшилади

Ўзбекистонда бир неча кундан буён давом этаётган ёғингарчилик фонида шаҳарлардаги ҳаво сифати яхшиланиши кузатилмоқда. Хусусан, соат 18:00 ҳолатига Тошкент шаҳрида PM2,5 зарралари концентрацияси 1 метр куб ҳавода 35 микрограммни ташкил этмоқда.

Фото: Kun.uz

Бу кўрсаткич билан Ўзбекистон пойтахти IQAir рейтингига киритилган дунё шаҳарлари орасида ҳавоси энг тоза 30 та шаҳардан бири бўлиб турибди.

IQAir АҚШдаги стандартларга асосан PM2,5 зарраларининг 50 м3/мкг гача бўлган кўрсаткичини “яшил”, яъни саломатлик учун безарар тоифага киритган. Бу зарралар бўйича Жаҳон соғлиқни сақлаш ташкилоти тавсия этган меъёр – 5 м3/мкг.

Порталдаги маълумотларга кўра, АҚШдаги стандартлар бўйича ҳисоблаганда, охирги 1 ойда Тошкентда 8 кун ҳаво сифати саломатлик учун “хавфли”, 9 кун “заиф гуруҳлар учун хавфли”, 13 кун “ўртача” даражада бўлган.