Россия армияси Авдийивкага кириш қисмини эгаллади

Донецк областининг Авдийивка шаҳрида Украина қуролли кучлари учун критик вазият юзага келди, дея маълум қилди АҚШ Миллий хавфсизлик кенгаши расмийси Жон Кирби журналистлар учун брифинг чоғида. «Биз украинлардан вазият ўта мураккаб экани, Россия қўшини ҳар куни украин позицияларига ҳужум қилишда давом этаётгани тўғрисида хабар олдик. Авдийивка Россия назорати остига ўтиши хавфи бор», — деган Кирби. Унинг сўзларига кўра, бу кўп жиҳатдан жойлардаги украин қўшинларида артиллерия ўқ-дорилари тугаётгани билан боғлиқ.

«Россия украин позицияларини штурм қилиш учун янги ёлланганларнинг янги тўлқинлари ортидан янгиларини юборишда давом этмоқда ва конгресс қўшимча ҳарбий ёрдам тўғрисидаги қонун лойиҳасини қабул қила олмаётгани учун биз Украинага улар россияликларнинг ҳужумларини қайтариши учун жуда зарур бўлган артиллерия снарядларини бера олмадик», — деган Кирби.

Россия кучлари Авдийивкадаги украин қўшинлари гуруҳидан етти баробар кўп, вазият ўта критик ҳолатда, деган «Азов» 3-штурм бригадаси вакили Олександр Бородин (ушбу бригада бир неча кун олдин Авдийивка йўналишига юборилганди). «Айрим бўлинмалар бизга 360 даража бўйлаб ишлай олади, 
яъни вазият чиндан ҳам оғир», — деган украин телевидениеси эфирида чиқиш қилган Бородин.

Украина Авдийивкадан қўшинларни олиб чиқишни бошлаган, дея хабар берган Американинг The Washington Post газетаси украин ҳарбийларига асосланган ҳолда. Нашр суҳбатдошлари Авдийивканинг бой берилиши — «вақт масаласи» бўлиб қолганини маълум қилишган. Нашрнинг қайд этишича, вайронага айланган кокскимё заводи украинларнинг шаҳардаги сўнгги таянчи бўлиб қолмоқда.

Авдийивкага шимолдан кириб келиш жойи Россия армияси томонидан эгалланган, бу ерда Зеленский бир ярим ой муқаддам видео эълон қилганди. Шаҳар шимолий чеккаларида РФ байроқлари ўрнатилмоқда. 15 феврал куни россиялик ҳарбий мухбир Евгений Поддубний шундай видеоларни намойиш этди. Видеодаги геолокациядан бу шаҳар номи ёзилган стела атрофи эканини кўриш мумкин, бу ерда украин ҳарбийлари шаҳарга кириб келишда фотосуратга тушар, Зеленский эса 2023 йил 29 декабр куни Украина қуролли кучларининг Авдийивкадаги позициясига ташриф буюрганида шу ерда видео олганди. Украинларнинг OSINT DeepState лойиҳаси рус қўшини Авдийивка шимолида илгарилаётганини тасдиқлаган ва Поддубний эълон қилган видеода акс этган участкани РФ армияси назоратига ўтган ҳудуд сифатида қайд этган. РФ қўшинлари эгаллаган йўл орқали Авдийивкадаги украин гарнизонига таъминот етказиб бериларди.

Володимир Зеленский Украина қуролли кучлари «имкон қадар кўпроқ украинлар ҳаётини сақлаб қолиш учун» бор имкониятни ишга солаётганини маълум қилган. У бу ҳақда украин халқига 15 феврал якунлари бўйича қилган видеомурожаатида фронтдаги вазиятни шарҳлай туриб айтган. Президентнинг сўзларига кўра, у Украина ҚК бош қўмондони Олександр Сирский ҳамда мудофаа вазири Рустем Умеровнинг ҳисоботини тинглаган. «Фронтдаги — Авдийивкадаги ва умуман бутун шарқдаги вазиятни. Армиямиз имкон қадар кўпроқ украинлар ҳаётини сақлаб қолиш учун етарли бошқарув ва техник имкониятларга эга бўлиши учун максимал даражада ҳаракат қиламиз», — деган Зеленский. Украина президенти Авдийивкадан қўшинлар олиб чиқилаётгани ҳақидаги хабарларни тўғридан тўғри изоҳламаган. Украина ҚК бош штаби ҳам бу ҳақда ҳеч нарса демаган.

Россия армияси 2023 йил октябрида Авдийивкани штурм қилишни бошлаган — ва ўтган вақт давомида катта йўқотишларга учраганди. Украина қуролли кучларининг собиқ бош қўмондони генерал Валерий Залужний ноябр ойида РФ қуролли кучлари Авдийивкага ҳужум давомида ўн мингга яқин кишисидан айрилганини маълум қилганди. Буюк Британия мудофаа вазирлиги октябр-ноябр ойларида Россия, катта эҳтимол билан, уруш бошидан буён энг катта йўқотишларига дучор бўлганини, «бу кўп жиҳатдан Авдийивкага юриш билан боғлиқлиги»ни маълум қилганди. АҚШ разведкаси декабр ойида РФ қуролли кучларининг бу йўналишдаги йўқотишларини ҳалок бўлган ва яраланган 13  минг аскарга, зирҳли техникадаги йўқотишларни — 220 га яқин машинага баҳолаганди. «Медиазона» ва BBC рус хизматининг очиқ манбалар асосида фронтда ҳалок бўлган россиялик ҳарбийлар ҳисобини юритиб борувчи журналистлари бир неча марта Авдийивка штурми бошланганидан буён некрологлар (ўлим хабарлари) жиддий ўсаётганини қайд этишган. Авдийивка ҳудудида жанг қилаётган ҳарбийларнинг қариндошлари қўмондонлик бу йўналишда сафарбар қилинганларни «қасддан қираётгани»дан шикоят қилишган.

Авдийивка — Украина қуролли кучларининг Донецк чеккасидаги муҳим истеҳкоми. Шаҳар аннексия қилинган Донецкдан 15 километр масофада жойлашган. 2014 йилда Авдийивка бир неча ой давомида айирмачилар назоратида бўлган, аммо Украина ҚК шаҳарни қайтариб олганди. 2022 йил февралида кенг кўламли уруш бошлангач, Россия қўшини Авдийивкага бир неча бор юриш уюштирди. «Украинская правда»нинг шаҳарда бўлган журналистлари уйларнинг аксар қисми вайрон бўлгани, Авдийивкада қолган аҳоли эса «совуқ, сув босган ертўлаларда жон сақлаётгани» ҳақида ҳикоя қилишган.