Россияда собиқ актёр сиртдан умрбод қамоқ жазосига ҳукм қилинди

Россия Федерациясининг Иккинчи Ғарбий округ ҳарбий суди собиқ актёр Кирилл Канахинни давлатга хиёнатда айблаб, сиртдан умрбод қамоқ жазосига ҳукм қилди, деб хабар бермоқда 26 феврал, душанба куни Россия агентликлари. Аниқлик киритилишича, маҳкама ёпиқ эшиклар ортида ва судланувчининг иштирокисиз ўтган. 

41 ёшли Канахин илгари «Глухар» сериали ва «Театр Луны»да ўйнаган ҳамда «Участковый» ва «Простые истины» сериалларида иштирок этган. «Интерфакс» агентлиги келтирган ҳукм матнига кўра, собиқ актёр 2018 йилда Россия ҳудудини тарк этган ва Россиянинг Украинага ҳужуми бошланганидан кейин, 2022 йил августида у «Россия кўнгиллилар корпуси» (РДК)га қўшилган.

Айблов томонининг таъкидлашича, у корпус таркибида Херсон вилоятида рус қўшинларига қарши жанговар ҳаракатларда, шунингдек, ўтган йил март ва май ойларида Брянск ва Белгород вилоятлари ҳудудида РДК ҳарбий рейдларида қатнашган. Хусусан, прокуратура маълумотларига кўра, Брянск вилоятининг Любечан қишлоғида 2023 йил 2 март куни РДК жангчилари икки маҳаллий аҳолини ўлдирган ва 10 ёшли болани яралаган. РДКнинг ушбу қотилликларга алоқадорлигини мустақил тасдиқлаш имконияти йўқ.

Собиқ актёр РДК рейдлари пайтида видеода кўриниш берди 

Ҳукм учун далиллар ушбу рейдлар пайтида суратга олинган видеолар бўлиб, уларда Канахин «М8Л8ТХ» блэк-метал гуруҳининг солисти, аввал Донбассда Украина томонида жанг қилган Алексей Левкин билан бирга бўлган. 2023 йил март ойида Канахин Россияда федерал қидирувга берилган ва апрел ойида у сиртдан ҳибсга олинган. Левкин ҳам ўша йилнинг май ойида қидирувга берилган эди.

«Россия кўнгиллилар корпуси» - Украина томонида жанг қилаётган қуролли тузилма, аммо фақат Россия фуқароларидан иборат. РДК жангчиларининг баёнотларига кўра, улар мақсади «ўз ерларини режимдан озод қилиш». Россияда РДК террорчи ташкилот сифатида тан олинган.

Украина томонида жанг қилаётган «Россия кўнгиллилар корпуси» ва «Россия озодлик легиони» бир неча бор Россиянинг Украина билан чегарадош вилоятларида рейдлар уюштирганини маълум қилган. Россия Ички ишлар вазирлиги ушбу тузилмаларнинг бир неча аъзоларини қидирувга берган.