Актёр бўлиш учун 2 млн сўм бадал – Навоийда кинода рол бериш эвазига мактаб ўқувчиларидан пул йиғилди 

Kun.uz’га Навоий шаҳридаги умумтаълим мактабларидан бирининг ижодий-маданий масалалар бўйича тарғиботчиси томонидан мурожаат келиб тушди. Унда таъкидланишича, Навоий шаҳридаги “Comprehensive Media” МЧЖ ўзлари томонидан вилоят ИИБ билан ҳамкорликда суратга олинаётган бадиий фильмда рол бераман дея мактаб ўқувчиларини алдаб, уларнинг ота-онасидан пул ундирган. Навоий вилояти ИИБ эса фильмни суратга олишда ҳамкорлик қилинмаганини, фақат айрим саҳналарда кўмаклашилганини таъкидлаяпти.

“19 июн куни номаълум рақамдан бир қиз қўнғироқ қилди. Рақамимни мактабимизнинг маънавият ишлари бўйича директор ўринбосари берган экан. Қўнғироқ қилган қиз Навоийда кино олинаётганини, актёрлик қобилияти бор ўқувчилар бўлса кастингга қатнашиши учун олиб боришимни айтди. Ўзим меҳнат таътилида эдим. Демак, раҳбариятга айтилган экан, деган ўйда 3 нафар ўқувчини олиб бордим.

Улар бир дунё ваъдалар бериб, ўқувчиларимни қизиқтириб қўйишди. Эртаси куни эса ота-оналар фарзандлари кинога тушиши учун 2 млн сўм тўлаб, шартнома имзолашди. Ана энди на кинодан, на пулдан дарак бор. Кейин билсак ушбу фирибгар тузоғига тушган бир биз эмас эканмиз”, дея билдирган мурожаатчи ўз мурожаатида.

Таҳририятга тақдим қилинган шартномада кўринишича, “Comprehensive Media” МЧЖ директори Учқунбой Рўзиқулов ушбу маблағларни гўёки ҳомийлик ёрдами сифатида қабул қилган. Аммо ана шу “ҳомийлик ёрдами” учун МЧЖ томонидан аниқ сумма белгиланган ҳамда бунинг эвазига суратга олиш жараёнида фуқаронинг иштирокини таъминлаш мажбуриятини олган. Демак, “ҳомийлик” ниқобига ўралган ушбу келишув ортида аслида маълум бир маблағ эвазига хизмат таклиф қилиняпти.

Шартноманинг яна бир нуқтаси эътиборни тортади. Агар шартнома бекор қилинса тўланган “ҳомийлик” маблағлари қайтарилмаслиги кўрсатиб ўтилган. Яъни агар кейинчалик ўқувчи фильмда суратга тушишни истамай қолса, режиссёрга тўлаган пули унга қайтарилмайди: кўрсатилмаган хизмат ёки бажарилмаган мажбурият учун пул олишнинг бу усулида фирибгарлик ҳолати ошкора бўй кўрсатиб турибди.

“Режиссёр”нинг тузоғига фақат Навоий вилояти эмас, қўшни Самарқанд вилоятидан ҳам “бўлажак актрисалар” илинган. Иккита вилоятда юзлаб бу каби шартномалар тузилган бўлиши мумкин.

Kun.uz ҳолатга ойдинлик киритиш мақсадида Навоий вилояти ИИБ ахборот хизмати билан боғланди. Ахборот хизматининг маълум қилишича, “Comprehensive Media” МЧЖ томонидан суратга олиниши режалаштирилган фильмга вилоят ИИБ ҳамкор сифатида кирмаган ҳамда суратга олишнинг молиявий манбаларини шакллантиришда бошқарманинг ҳеч қандай алоқаси йўқ. Шунингдек, ҳозирда ҳолат ҳуқуқни муҳофаза қилувчи органлар томонидан назоратга олиниб, тегишли тартибда ўрганилмоқда экан.

Очиқ манбаларда келтирилишича, “Comprehensive Media” МЧЖ 2022 йилнинг апрел ойида давлат рўйхатидан ўтказилган. Аммо ҳозирда фаолият юритмаётгани кўрсатилган. Устав фонди 300 минг сўм бўлган МЧЖнинг раҳбари Учқунбой Рўзиқулов.

П.с: Мақола эълон қилингач, “Comprehensive Media” МЧЖ раҳбари Учқунбой Рўзиқулов таҳририят билан боғланиб, расмий муносабат билдирди. Унинг таъкидлашича, “Кулранг бўрилар” фильмини суратга олиш учун кастинг ўтказилган. Сўнгра танлаб олинганлардан ўзини-ўзи қоплаш мақсадида ихтиёрий равишда 2 млн сўм олинган. Шартнома ота-оналар билан тузилган. Ҳозирда суратга олиш ишлари давом этмоқда экан. Навоий, Тошкент ва Нукус шаҳарларида давом этаётган суратга олиш ишларига актёр ва актрисалар навбати билан ҳамда жойига қараб чақирилади, ҳозирда иссиқ туфайли улар чақирилмаяпти, дея изоҳлаган МЧЖ раҳбари ўз расмий муносабатида ҳолатни.