Сурхондарёда ҳоким ёрдамчиси сохта ҳужжат расмийлаштириб, қарийб 700 млн сўмни ўзлаштирди

У фуқаролардан бири билан шерикликда сохта ҳужжатлар расмийлаштириб, 11 нафар фуқаро ва 1 нафар тадбиркор номига кредит олиб, талон-торож қилган.

Сурхондарё вилоятида ҳоким ёрдамчиси сохта ҳужжатлар орқали катта миқдордаги кредит маблағларини ўзлаштирган. Бу ҳақда Бош прокуратура департаменти хабар бермоқда.

Департаментнинг Жарқўрғон туман бўлими томонидан ўтказилган терговга қадар текширувда фуқаро Н.Ш. ҳамда тумандаги “И.” МФЙда ҳоким ёрдамчиси бўлиб ишловчи Х.М. 11 нафар фуқаро ва якка тартибдаги тадбиркор У.Т.нинг номига сохта ҳужжатларни расмийлаштириш орқали 698 млн сўм кредит ажратиб, ушбу маблағларни ўзлаштириш йўли билан талон-торож қилгани аниқланган.

Қайд этилишича, мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 209-моддаси (мансаб сохтакорлиги) билан жиноят ишлари қўзғатилиб, тергов ҳаракатлари ўтказилмоқда.

Тайёрлаган: Ғайрат Йўлдошев

#Сурхондарё #кредит #ҳоким ёрдамчиси