Айрим шахслар йўқотилган паспорт ва ID-картани алмаштириб беришда давлат божидан озод этилади

Ўзгалар парваришига муҳтож бўлган ёлғиз яшовчи ҳамда ёлғиз кекса ва ногиронлиги бўлган шахслар йўқотилган биометрик паспорт (идентификация ID-карта)ни улар реестрга киритилгунига қадар “Инсон” маркази буюртмаси асосида алмаштириб беришда давлат божидан озод қилинади.

“Давлат божи тўғрисида”ги қонуннинг 13-моддасига қўшимчалар киритиш ҳақида”ги қонун лойиҳаси эълон қилинди.

Лойиҳа президент қарори билан тасдиқланган Ижтимоий ҳимояга муҳтож кекса ва ногиронлиги бўлган шахсларни қўллаб-қувватлаш тизимини янада такомиллаштириш бўйича “йўл харитаси” ижросини таъминлаш мақсадида Ички ишлар вазирлиги томонидан ишлаб чиқилган.

Лойиҳада қуйидагилар назарда тутилмоқда:

ўзгалар парваришига муҳтож кексалар ва ногиронлиги бўлган шахсларга ижтимоий хизматларни кўрсатиш тизимини такомиллаштириш, уларни қўллаб-қувватлаш, жамиятга интеграция қилиш ва мустақил ҳаёт кечиришлари учун зарур шароитлар яратиш, ижтимоий хизматлар кўрсатиш жараёнини рақамлаштириш, кўрсатилаётган ижтимоий хизматлар сифатини ошириш;
ўзгалар парваришига муҳтож бўлган ёлғиз яшовчи ҳамда ёлғиз кекса ва ногиронлиги бўлган шахсларга ижтимоий хизматлар кўрсатишда енгилликлар яратиш, жумладан, уларнинг йўқотилган биометрик паспортлари (идентификация ID-карталари)ни улар реестрга киритилгунига қадар “Инсон” ижтимоий хизматлар маркази буюртмаси асосида алмаштириб беришда давлат божидан озод қилиш.