«Арсенал» яна биринчи ўринда, «Сити» баҳсли қарор билан финалга чиқди. Европада кун ўйинлари

Англия: «Сити»га таскин берувчи финал

«Манчестер Сити» – «Челси» 1:0
Гол: 1:0 – 84 Бернарду Силва.
«Манчестер Сити» – Ортега, Уокер, Аке, Аканжи, Стоунз (Рубен Диаш, 46), де Брюйне, Грилиш (Доку, 66), Бернарду Силва, Родри, Фоден, Алварес (Бобб, 88).
«Челси» – Петрович, Гюсто (Дисаси, 79), Тиаго Силва, Чалоба, Кукуреля (Чилуэлл, 88), Галлаҳер, Фернандес (Стерлинг, 88), Палмер, Кайседо, Мадуэке (Мудрик, 79), Жексон.
Огоҳлантиришлар: Кайседо (45), Алварес (58), Петрович (83), Фоден (83), де Брюйне (86), Фернандес (86).

Чоршанба куни «Сити» «Реал»га аламли тарзда мағлуб бўлиб, Чемпионлар лигасини тарк этганди. Қолаверса, бу ўйинда 120 дақиқа ҳаракат қилишга тўғри келганди. «Челси»да эса Англия Кубоги яримфиналига тайёрланиш учун бир ҳафта вақт бор эди. Катта эҳтимол билан шу туфайли дастлабки 10 дақиқаликда «Уэмбли»даги ўйинда рақибдан фаолроқ ҳаракатланди.

Кейин эса «Сити» ҳам вазиятлар ярата бошлади. Де Брюйне жарима майдонига аъло даражадаги узатма етказиб берди ва Фоден дарвозабон билан яккама-якка ҳолатга чиқиб борди. Петрович тўп томон ташланди ва англиялик футболчини тўпни чапга олиб ўтиб, ноқулай нуқтадан зарба беришга мажбур қилд – вазият бой берилди. Эҳтимол бу эпизодда Фоденнинг ўрнида Ҳоланд бўлганида бир тегинишда тўпни дарвоза тўрига жойлаши мумкин бўларди. Аммо норвегиялик тўпурар жароҳат туфайли ўйин қайдномасига ҳам киритилмаганди.

Қайсидир паллада «Сити» рақибни шу қадар босим остида қолдирдики, Аканжи бошқа бир ҳимоячи Акени рақиб жарима майдони ичида пас билан таъминлади. Кўп ўтмай ноодатий ҳолат кузатилди: Алварес қулай позициядан зарба берди, аммо де Брюйне тўп йўлида пайдо бўлди.

Танаффус арафасида «Челси»да ҳам голли вазиятлар пайдо бўла бошлади. Палмер рақиб жарима майдони ичида Родрини алдаб, кучли зарба берди, аммо Ортега қутқарди. Кейин эса у Жексонни яккама-якка вазиятга чиқариб юборди, аммо ҳужумчи суст ҳаракат қилди ва ҳатто зарба ҳам беролмади. У танаффусдан кейин ҳам деярли шундай вазиятни кўкка совурди.

Иккинчи бўлимда, Жексон бой берган вазиятлардан ташқари (у бир неча метрдан туриб ҳам бош билан яхши зарба бера олмади), анчагина баҳсли эпизод рўй берди. Палмер жарима зарбасини ижро этди ва тўп жонли деворда турган Грилишнинг қўлига тегиб, майдонни тарк этди. Кадрларда бу вазиятда тўп футболчининг қўлига теккани аниқ кўринган, аммо ҳакам буни пайқамади ва ҳатто бурчак зарбаси бермади. Палмер ва жамоадошлари пеналти талаб қилишди, аммо VAR бош арбитрнинг қарорига қўшилди.

Бу ўйинда ҳам иккинчи бўлим ўрталарида Доку ўйинга қўшилиб, ўз финтлари билан рақиб ҳимоячиларининг кўзини очирмади. Ва у бу ишни нафақат чап қанотда, балки жарима майдонининг чап қисмида амалга оширди. Айнан ушбу белгиялик вингернинг юришидан кейин «Сити» ҳисобни очди. «Челси» дарвозабони биринчи зарбани қайтарди, аммо тўп Бернарду Силвага келиб тушди ва у дарҳол тўпни дарвозага жойлаб қўйди.

Бу гол ўйинда ягоналигини сақлаб қолди. У қадар кучли ўйин кўрсатмасдан ҳам Гвардиола жамоаси финалга йўл олди. Якшанба куни «Сити» Англия Кубоги учун ҳал қилувчи баҳсдаги рақибини билиб олади. Иккинчи яримфинал ҳам «Уэмбли»да «Манчестер Юнайтед» ва «Ковентри» жамоалари ўртасида ўтказилади. Финал 25 майга белгиланган.

«Вулверҳэмптон» – «Арсенал» 0:2
Голлар: 0:1 – 45 Троссар, 0:2 – 90+5 Эдегор.
«Вулверҳэмптон» – Жозе Са, Доэрти (Аит-Нури, 75), Буэно, Килмен, Гомеш, Буэно, Гомес, Дойл, Траоре, Чирева (Сарабия, 75), Ҳванг Ҳи Чҳанг (Лемина, 51).
«Арсенал» – Райя, Уайт, Габриэл, Салиба, Кивер, Эдегор, Райс, Ҳаверц, Троссар (Мартинелли, 72), Сака, Габриэл Жезус (Парти, 80).
Огоҳлантиришлар: Троссар (29), Гомеш (32), Райс (35), Килмен (35), Ҳванг Ҳи Чҳанг (51).

«Арсенал» бир неча кун оралиғида иккиталик шок ҳолатини бошдан кечириб, АПЛда етакчиликни бой берган ва Чемпионлар лигасини чоракфиналда тарк этганди. Бу вазиятдан чиқиш учун «канонирлар» навбатдаги тур ўйинига қатъий тайёргарлик кўришганди. Илк дақиқадаёқ Ҳаверц ҳаводаги тўпни тўхтатмасдан зарба берди, аммо кейин меҳмонларнинг кўплаб ҳужумлари «бўрилар» ҳимоясидан ўта олмади. «Арсенал» кўплаб вазиятлар яратди, кетма-кет зарбалар берди, аммо голга мезбонлар яқинроқ келишди. Жоау Гомеш Кивиорнинг навбатдаги хатосидан фойдаланиб, жарима майдони ичида яқин масофадан зарба берди. Аммо Раяй «Арсенал»ни қутқариб қолди ва тўпни устун томон йўналтириб юборди.

Биринчи бўлим охирида эса лондонликлар барибир ҳисобни очишди. Бу ҳужумда Габриэл Жезуснинг ностандарт жонбозлиги барчасини ҳал қилди. У жарима майдони ичида қўл билан очиқчасига йиқитилганида тўхтаб қолмади ва тезда ўрнидан туриб Троссарни қулай вазиятга чиқарди. Белгиялик ҳужумчи дарвозабонга ҳеч қандай имконият қолдирмаган ҳолда зарба йўллади. У жорий мавсумда гол ва голли паслари сони иккиталик рақамда ифодаланадиган олтинчи «канонир»га айланди.

Иккинчи бўлим анча сокин кечди – «Вулверҳэмптон» 71-дақиқага қадар умуман дарвозага зарба бермади. Иккинчи бўлимда ўйинга қўшилган Леминанинг зарбаси ҳам жуда омадсиз чиқди, бундай зарба фақат дарвозабон йўқлигида голга айланиши мумкин эди. Меҳмонлар эса иккинчи бўлим охирида ҳам яна битта гол уришди. Эдегор ўткир бурчакда турганига қарамай дарвозани ишғол этди. Дарвозабон марказга узатмани кутганди, аммо норвегиялик уни доғда қолдирди.

«Арсенал» «Вулверҳэмптон»га қарши қаторасига 33 ўйинни голсиз тарк этмади. Англияда ҳеч бир рақиб «Арсенал»дан бундай жабрланмаган, қолаверса, Артета жамоаси АПЛда сафар учрашувларида 541 дақиқадан буён дарвозаси дахлсизлигини сақлаб қолмоқда. Асосийси — жамоа яна биринчи ўринда. «Манчестер Сити»да захира ўйини бор, аммо «шаҳарликлар»нинг кубок яримфиналидаги иштироки туфайли «Тоттенҳэм»га қарши ўйини қолдирилган. Гвардиола жамоасини кейинги ҳафтада уч кун ичида иккита сафар ўйини кутмоқда — Брайтон (25 апрел) ва Ноттингҳемда (28 апрел). 

Тур ўйинини бугун ўтказадиган «Ливерпул» эса «Арсенал»дан ўзиб кетиши учун «Фулҳэм» дарвозасига 10 та жавобсиз гол уриши керак бўлади. Клопп шогирдлари ҳам кейинги ҳафтада уч кун ичида иккита сафар ўйинида майдонга тушади — «Эвертон» (24 апрел) ва «Вест Ҳэм»га (27 апрел) қарши.

«Арсенал» 24 апрелга ўтар кечаси «Челси»ни қабул қилади, 28 апрел куни «Тоттенҳэм» меҳмони бўлади. Шундай экан, чемпионлик интригаси давом этади.

Испания: «Жирона» ЕЧЛга яқинлашмоқда

«Жирона» – «Кадис» 4:1
Голлар: 1:0 – 9 Эрик Гарсия, 2:0 – 22 Мартин, 3:0 – 71 Довбик, 3:1 – 81 Эскаланте, 4:1 – 82 Порту.
«Жирона» – Гассанига, Эрик Гарсия, Блинд, Давид Лопес, Мигел Гутеррес (Мартинес, 76), Ян Коуто (Торре, 86), Алеиш Гарсия, Эррера (Солис, 58), Мартин (Порту, 76), Савио, Довбик (Тони Виля, 86).
«Кадис» – Ледесма, Карселен, Виктор Чуст, Усу, Пирес, Алехо (Собрино, 70), Наварро (Гвардиола, 86), Алекс Фернандес (Эскаланте, 46), Алкарас, Хуанми (Рамос, 46), Макси Гомес (Рохер Марти, 70).
Огоҳлантиришлар: Алекс Фернандес (31), Мигел Гутеррес (42), Виктор Чуст (75).

«Жирона» Чемпионлар лигасига тарихий йўлланмани қўлга киритишга янада яқинлашди. Қолаверса, кейинги турда «Атлетико» ва жума кунги ўйинда очко йўқотган «Атлетик» ўзаро ўйнайд. Каталонияликлар «Кадис» билан ўйинда ўз позициясини яхшилаш учун идеал ўйин намойиш этди. Бу рақиб примерада қолиш учун кураш олиб бормоқда ва қутқарув амалиёти доирасида бир неча тур олдин «Атлетико»ни мағлуб этганди.

Аммо «Жирона» билан ўйинда бу номер иш бермади. Мичел Санчес жамоаси барқарор график бўйича кетмоқда — сафарда ютқазмоқда, аммо ўз уйида уч очкони ҳеч кимга бермаяпти. Бу сафар қаторасига тўртинчи уй ўйинида ғалабага эришилди, бу ўйин натижаси биринчи бўлимдаёқ ҳал бўлди. 45 дақиқада 2 гол урилгани — меҳмонларнинг омади келгани эди. Ўйиннинг энг яхши футболчиси бўлган Савио дарвозабонни алдаб ўтганидан кейин тўсинни мўлжалга олди. «Кадис»нинг иккинчи бўлимда, ҳисоб аллақачон 3:0 кўринишини олганида урган жавоб голидан кўп ўтмай ҳисоб янада йириклаштирилди.

«Жирона»нинг очколари сони энди 68 тага етди. Агар Испаниянинг доимий кучли учлиги ҳисобга қўшилмаса, 32 турдан кейин бундай кўрсаткичга ла лиганинг бутун тарихида фақат уч жамоа эришган — «Реал Соседад» (1979/80), «Валенсия» (2003/04) ва энди «Жирона». Орзуга қадар яна бир неча қадам қолди.

Италия: неаполитанча комплекс

«Эмполи» – «Наполи» 1:0
Гол: 1:0 – 4 Черри.
«Эмполи» – Каприле, Берешински, Луперто, Валюкевич, Пеццелла (Какаче, 82), Грасси (Бастони, 82), Мале, Фаццини (Журковски, 70), Жаси, Камбяги (Канчелери, 70), Черри (Нянг, 20).
«Наполи» – Мерет, Ди Лоренцо, Жезус, Эстигор, Натан (Маццокки, 46), Лоботка, Зелински, Замбо-Ангисса (Симеоне, 89), Политано (Нгонж, 72), Кварацхелия (Распадори, 72), Осимҳен.
Огоҳлантиришлар: Жезус (37), Пеццелла (54), Берешински (58), Нгонж (90+3).

Италиядагилар кейинги, янги форматдаги Чемпионлар лигаси учун бешинчи йўлланмадан хурсанд бўлаётганида скудеттонинг амалдаги эгаси кейинги мавсумни еврокубокларсиз ўтказиши хавфи остида қолмоқда. «Наполи» ўтган турда ўз уйида хавфли ҳудуддаги «Фрозиноне»ни мағлуб этолмаганди (2:2), энди эса Франческо Калцона жамоаси лигада қолиш учун курашаётган бошқа бир рақиб фонида кучсиз кўринди. Сўнгги олти турдан бештасида гол урмасдан ютқазган «Эмполи» учрашув дебютидаёқ ҳисобни очди. Дарвозабоннинг узун паси, қанотдан ҳужум ва Черри бош билан зарба бериб дарвозани ишғол этди. Меҳмонлар эса бунга жавобан ҳеч нарса таклиф қила олишмади. Неаполитанликларда «Эмполи»га нисбатан комплекс давом этди. Сўнгги беш йилда ушбу жамоа жанубликларни етти учрашувдан бештасида мағлубиятга учратган. Бу давр оралиғида «Наполи»ни фақатгина «Интер» кўпроқ ранжита олган (6 ғалаба).

Германия: «Лейпциг» Дортмунддан узоқлашмоқда

«Ҳайденҳайм» – РБ «Лейпциг» 1:2
Голлар: 0:1 – 42 Шешко, 1:1 – 69 Доведан, 1:2 – 85 Опенда.
«Ҳайденҳайм» – Мюллер, Траоре, Майнка, Гимбер (Тойеркауф, 68), Ференбаҳ, Мэлоуни (Шеппнер, 54), Бесте, Зесса (Шиммер, 84), Динкчи (Томалла, 68), Кляйндинст, Пирингер (Доведан, 68).
РБ «Лейпциг» – Гулачи, Хенрихс (Симакан, 71), Орбан, Лукеба, Раум, Шлагер, Олмо (Клостерманн, 90), Айдара (Зайвалд, 79), Симонс (Элмаз, 79), Опенда, Шешко (Баумгартнер, 79).
Огоҳлантиришлар: Хенрихс (33), Гимбер (61), Шеппнер (83), Траоре (90+8).

«Ҳайденҳайм» сўнгги вақтларда фаворитлар учун ҳақиқий даҳшатга айланмоқда. Ушбу жамоа Штутгартда ғалаба қозонишига бир бахя қолганди (3:3) ва «Бавария»ни нокаутга учратганди (3:2), ундан олдинроқ эса Дортмунднинг «Боруссия» клуби ушбу жамоа дарвозасига йўл топа олмаганди (0:0). «Лейпциг» ҳам шанба кунги ўйинда катта муаммога учради. Биринчи бўлим охирида Шешко урган гол ғалаба учун етарли бўлмади. Мезбонлар яна стандарт вазиятдан максимум натижа чиқариб, ҳисобни тенглаштиришди, кейинги дақиқаларда Гулачи қаҳрамонлик кўрсатмаганида меҳмонлар ўйинни бой берган бўларди.

Аммо ўйин якунида «Лейпциг» ўз қуролидан — тезкор қарши ҳужумдан фойдаланди. Симаканнинг узатмасини тўсишга ҳаракат қилган ҳимоячи тўпни Опенданинг оёқлари остига ташлаб берди. Натижада Марко Розе жамоаси тўртинчи ўринда қолди, якшанба куни Дортмунддаги ўйинда «Байер»нинг рекорд даражадаги мағлубиятсиз сериясига барҳам берилса ҳам турнир жадвалидаги вазият ўзгармайди. Чемпионлар лигаси йўлланмаси учун курашдаги муҳим ўйин кейинги турда бўлиб ўтиши керак, «Боруссия» Лейпцигга меҳмонга келади. Ҳозирча «ҳўкизлар» жамоаси «Бавария»нинг рекордини такрорламоқда — жамоа 32 ўйиндирки иккинчи бундеслигадан чиққан жамоага ютқазмаяпти.

«Унион» – «Бавария» 1:5
Голлар: 0:1 – 29 Горетцка, 0:2 – 45+1 Кейн, 0:3 – 53 Мюллер, 0:4 – 61 Тел, 0:5 – 66 Мюллер, 1:5 – 90 Вертессен.
«Унион» – Реннов, Триммел (Юранович, 59), Фогт, Диогу Лейте (Кауфманн, 59), Дуки, Гозенс, Тузар, Шафер (Лайдуни, 59), Ааронсон, Фолланд (Кноҳе, 72), Ҳоллербаҳ (Вертессен, 59).
«Бавария» – Нойер, Дайер, Ким Мин Жэ (Упамекано, 59), Дэвис, Павлович, Горетцка (Лаймер, 71), Киммиҳ (Мазравий, 71), Мюллер (Звонарек, 84), Шупо-Мотинг (Сарагоса, 71), Кейн, Тел.

Сўнгги 11 мавсум ичида илк бор чемпионликни бой берган «Бавария» бу мавсумда айрим ўйинларда бундеслигадан зериккандек кўринди. Мюнхенликлар ўз уйида кечган немис класикода курашмасдан мағлуб бўлди, кейин эса «Ҳайденҳайм»га қарши ўйинда икки дақиқа ичида икки гол устунлигини қўлдан чиқариб, якунда ўйинни бой беришни уддалади.

Чемпионлар лигасидаги муваффақиятли натижалардан кейин ички чемпионатда ҳам вазият яхшилана бошлади. «Кёлн» билан ўйинда мюнхенликлар осонлик билан ғалабага эришди, бу турда Берлинда кечган ўйинда ҳам жамоа чиройли голлар уриб, рақибни оригинал ёндашувлар билан доғда қолдирди. Биринчи голли комбинацияда Телнинг паси ва Горецканинг тўсин остидан йўллаган зарбасидан кўра Мюллер ҳимоячилар кутмаган тарзда тўпни ўтказиб юбориши барчасини ҳал қилди. Кейннинг жарима зарбасидан урган голида эса жамоанинг штатдаги ижрочиси Киммиҳ тўп устидан сакраб ўтиб кетиши «жонли» девордагиларни чалғитиб юборди. Opta маълумотига кўра, Ҳарри бу голидан кейин Европанинг энг сермаҳсул футболчиси Мбаппе билан тенглашиб олди ва ўзининг шахсий рекордини такрорлади. Гап клуб сафидаги барча ўйинлардаги 50 самарали балл ҳақида бормоқда, аммо бу ўринда турли манбаларнинг маълумотлари турлича. Transfermarkt статистикасига кўра, Мбаппеда чиндан ҳам 50 очко (41+9) бор, Кейнда эса бу рақам 53 га тенг (40+13). Нима бўлмасин, бу ажойиб кўрсаткич.

Ўйиннинг қолган қисмида Мюллер ўзига хос миссияни якунлади. У ўз фаолияти давомида шу вақтгача фақат 29-турда гол урмаганди. Бу ўйинда эса у бу ишни икки бор амалга оширди. Аммо бу уникал кўрсаткич эмас. Бундеслигадаги амалдаги футболчилардан дортмундликлар сафида Ройс ҳамда бу сафар «Унион» сафида ҳеч қандай ҳаракати билан ёдда қола олмаган Фолланд 34 турнинг барчасида (турли мавсумларда) гол уришган.

Кун статистикаси

• «Шеффилд Юнайтед» Англия чемпионатида уй ўйинларида камида 50 та гол ўтказиб юборган 3-жамоага айланди. Бунга қадар ўз стадионида бу қадар ёмон ўйин «Астон Вилла» (1935/36) ва «Челси» (1959/60) жамоаларида бўлган.
• «Манчестер Сити» ўз тарихида 3-бор қаторасига икки мавсумда Англия Кубогига чиқмоқда.
• «Брентфорд» ўз тарихида илк марта сафарда 5 гол уриш учун Англиянинг юқори дивизионида 160 ўйин ўтказишига тўғри келди.