«Астон Вилла» — «Ливерпул» 3:3
Голлар: Тилеманс (12), Дуран (85, 88) — Мартинес (2, автогол), Гакпо (23), Кванса (48).
«Астон Вилла» – Мартинес, Конса, Диего Карлос, Пау Торрес, Дин, Макгинн, Тилеманс (Заниоло, 65; Дуран, 79), Бэйли, Дуглас Луис (Чемберс, 80), Диаби, Уоткинс.
«Ливерпул» – Алиссон, Александер-Арнолд, ван Дейк, Куанса, Гомес, Эндо (Собослаи, 76), Мак Аллистер, Эллиотт (Гравенберҳ, 75), Салоҳ, Диас (Жонс, 76), Гакпо (Нунес, 75).
Огоҳлантиришлар: Эллиотт (38), Макгинн (70).
АПЛнинг 37-тури доирасидаги сўнгги учрашув воқеаларга бой б ўлди. «Астон Вилла» ва «Ливерпуль» мухлисларбоп ўйин намойиш этишди, аммо дурангга рози бўлишди.
Ўйиндаги ғалати воқеалар илк дақиқалардан бошланди. Иккинчи дақиқада Эллиот қанотдан узатма берди, 2022 йилги жаҳон чемпиони Эмилиано Мартинес эса «Тоттенҳэм» мухлисларини хушнуд қилган ҳолда тўпни ўз дарвозасига киритиб юборди. Бу вазиятда дарвозабонни рикошет чалғитди, тўп Пау Лопесга тегиб йўналишини ўзгартиргани туфайли у ортга тисарилишига тўғри келди ва тўпни тўсди, аммо тойиб кетди ва тўпни қўлларидан чиқариб юборди.
«Астон Вилла» ва «Тоттенҳэм» айни вақтда Чемпионлар лигасига тўртинчи йўлланма учун курашмоқда. Ўйин арафасида Унаи Эмери жамоаси тўртинчи ўринда турган ва «Тоттенҳэм»ни тўрт очкога ортда қолдираётганди. «Астон Вилла»нинг ғалабаси лондонликлар клубининг ЕЧЛ учун имкониятларини бутунлай йўққа чиқарган бўларди.
Бирмингҳэмликлар эса ўйин стартида муваффақиятсизликка учрашди. Муҳаммад Салоҳда фарқни ошириш имконияти бўлганди — мисрлик ҳужумчининг зарбасидан кейин тўп ҳимоячига тегиб майдон ташқарисига чиқиб кетди. Бироз ўтиб Коди Гакпо ўткир бурчакдан тўпни устунга теккизди.
Аммо Эмери жамоаси ўзини қўлига олди ва кўп ўтмай ҳисобни тенглаштирди. Юри Тилеманс кучли зарба билан дарвозани ўққа тутди, аммо бу голни Олли Уоткинс юзага келтирди. Англиялик ҳужумчи дриблинг билан ҳимоячиларни ортда қолдирди ва жамоадошини қулай вазиятга чиқарди. Ҳимоячилар Уоткинс билан андармон бўлиб, Юрини жарима майдони марказида ёлғиз қолдиришганди. Уоткинс мавсумдаги 13-голли пасини амалга оширди — Европанинг топ-5 лигаларидаги энг яхши кўрсаткич.
12-дақиқагача икки гол урган жамоалар тўхташ ҳақида ўйлашмасди. 23-дақиқада «Ливерпул» яна ҳисобда олдинга чиқди. Бу сафар Коди Гакпо Жо Гомеснинг қанотдан узатмасини бўш дарвозага киритди. Ҳакамлар эпизодни узоқ текширишди, чизиқлар тортишди ва якунда Гомесда офсайд топа олишмади. Шундан кейин Саймон Ҳупер майдон марказини кўрсатди ва мерсисайдликларга қўшилиб «Тоттенҳэм» мухлислари ҳам бу голни нишонлашди.
