Тадбирда ушланган "наркокурер" қўлидаги гиёҳванд моддаларни ютиб юборишга уринди

Тошкент шаҳрида ўтказилган тезкор тадбирда гиёҳванд модда билан ушланган фуқаро героинни ютиб юборишга уринган. Бу ҳақда Kun.uz’га Тошкент шаҳар ИИББ ахборот хизмати хабар берди.

Маълум қилинишича, Тошкент шаҳрида ўтказилаётган “Долзарб ойлик” тезкор профилактик тадбирларидан бирида Чилонзор туманида пост патрул хизмати ходимлари томонидан фуқаролардан бирининг ҳаёти сақлаб қолинган ва гиёҳвандлик моддасининг тарқалиши олди олинган.

Фуқаро жиноятини яшириш мақсадида ёнида бўлган героинни ютиб юбормоқчи бўлганда ППХ ходимлари уни тўхтатиб қолган. Фуқаро героинни ютиб юборганда гиёҳвандлик моддаси унинг ҳаётига хавф туғдириши мумкин эди.

Чилонзор тумани ИИО ФМБ тергов бўлими берган маълумотга кўра, мазкур олинган далилий ашёларнинг оғирлиги 4.81 грамм героин экани аниқланган.

Қайд этилишича, ҳозирда ҳолат юзасидан суриштирув ҳаракатлари олиб борилмоқда.

Маълумот учун, Жиноят кодексининг 273-моддаси 5-қисмига кўра, мазкур жиноят учун 10 йилдан 20 йилгача озодликдан маҳрум қилиш жазоси назарда тутилган.