20 октябрь куни Марказий банк маълум қилганидек, сентябрь ойида Россиянинг олтин захираси яна 0,2 миллион троя унциясига (тахминан 6,2 тоннага) қисқарди, унинг умумий ҳажми эса 2019 йил охиридан бери энг паст кўрсаткичга — 72,8 миллион унциягача тушиб кетди.
Декабрь ойида Марказий банк сўнгги ўн йилликлардаги энг йирик сотувни бошлаганидан буён унинг захираларидаги олтин миқдори 2 миллион троя унциясига, яъни тахминан 62 тоннага камайди.
Халқаро валюта жамғармаси статистикасига кўра, замонавий тарихда Россия ўз олтин захирасини фақат бир марта бундан тезроқ ва кўпроқ сотган: 1998 йилда дефолт, валюта инқирози ва давлат қисқа муддатли облигациялари пирамидасининг қулаши фонида Марказий банк уч ой ичида 3,8 миллион троя унцияси (118 тонна) олтин сотиб юборган эди. Тўғри, йил охирига келиб қуймаларнинг бир қисми қайта сотиб олинган ва йил якунида Марказий банкнинг олтин захираси 1,6 миллион унцияга (тахминан 50 тоннага), яъни жорий йилдагидан камроққа қисқарган.
Кейинчалик Кремль захираларда фақат олтин тўплаб борди ва 1990 йилларнинг охиридан бери олтин захирасини беш баробардан кўпроққа оширди. 2022 йил бошига келиб у 74 миллион троя унцияси ёки 2,3 минг тоннани ташкил этиб, ҳажми бўйича дунёда бешинчи ўринда турарди.
Ўтган йил охирида бошланган ҳамда Россия Марказий банкини дунёдаги барча марказий банклар орасида энг йирик олтин сотувчисига айлантирган бу сотув жараёни Молия вазирлиги илгари Миллий фаровонлик жамғармаси (ФОБ) активлари билан ўтказган операцияларни «акс эттириш» билан боғлиқ, деб таъкидлайди Reuters:.
Сотилган Россия олтинининг бир қисми Хитойга оқиб кетмоқда — у жорий йилда Россиядан қимматбаҳо металл харид қилишни тарихий рекорд даражагача оширди. Хитой божхона бошқармаси маълумотларига кўра, январь-июль ойларида Ҳонконгга Россияда қазиб олинган 100 тоннага яқин олтин келтирилган — бу ўтган йилнинг шу даврига нисбатан уч баробар кўпдир.
Дунёдаги энг йирик Лондон бозори Россия олтини учун ўз эшикларини ёпгач, россиялик етказиб берувчилар экспортни шарққа йўналтирмоқда. Урушнинг биринчи йилидаёқ Россиядан Хитойга олтин оқими ёпирилган ва, Financial Тимес ҳисоб-китобларига кўра, шундан бери Ҳонконг орқали 35 миллиард долларлик қимматбаҳо металл олиб чиқиб кетилган.
