«Райффайзенбанк» Россияда жисмоний шахслар учун хорижий валютадаги ўтказмаларни тўхтатади

Россияда «Райффайзенбанк» 2 сентябрдан жисмоний шахсларга хорижий валютада пул ўтказмаларини амалга оширишни тўхтатади. Бу ҳақда РБК агентлиги 15 август, пайшанба куни банкнинг мижозларни қўллаб-қувватлаш хизматига таяниб хабар берди. Таъкидланишича, бу қарор Raiffeisen Bank International AG (RBI) банк гуруҳи томонидан Европа Марказий банки (ЕМБ) буйруғи билан боғлиқ ҳолда қабул қилинган. 

Жисмоний шахслардан Россия Федерациясига барча валюта ўтказмалари 30 август куни Москва вақти билан соат 16.00 дан олдин банк томонидан ижро учун қабул қилиниши керак, дея қўшимча қилинган. Чекловлар банкнинг йирик ва халқаро бизнесдаги бир қатор корпоратив мижозларига ҳамда рублдаги трансчегаравий ўтказмаларга татбиқ этилмайди, дея қўшимча қилиб ўтди РБК.

ЕМБ банкдан Россиядан чиқишни тезлаштиришни талаб қилмоқда

Апрель ойида RBI ЕМБдан Россияда бизнесни қисқартиришни тезлаштириш бўйича сўровни кутган эди. Май ойида «Райффайзенбанк» июн ўрталаридан бошлаб Россияда доллардаги пул ўтказмаларини жўнатишни тўхтатмоқчи эканлиги маълум бўлди, шунингдек, янги депозит ва жамғарма ҳисобварақларини очмасликка қарор қилди. Ўша пайтда долларда кирувчи тўловларга ҳеч қандай чекловлар йўқ эди. 

25 май куни Италиянинг Стреза шаҳрида бўлиб ўтган «катта еттилик» молия вазирлари йиғилиши иштирокчилари «аниқ тарзда», Reuters таъкидлаганидек, Австрия банкига Россия бозоридаги бизнесини қисқартиришни тавсия қилишди. АҚШ молия вазири Жанет Йеллен Вашингтон Россияга Украинага нисбатан тажовузкорлиги учун жорий қилинган санкцияларга қарамай, Россия Федерациясида фаолиятини давом эттираётган банкларга қарши иккиламчи санкциялар жорий этиш имкониятини кўриб чиқаётгани ҳақида огоҳлантирди.