Сенат болани ноқонуний диний таълимга жалб қилганлик учун жавобгарлик кўзда тутилган қонунни маъқуллади

Қонун билан «Бола ҳуқуқларининг кафолатлари тўғрисида»ги қонунга ва Маъмурий жавобгарлик тўғрисидаги кодексга ота-оналар ёки уларнинг ўрнини босувчи шахслар томонидан болани қонунга хилоф равишда диний таълим олишга жалб қилишга йўл қўймаслик, шунингдек ушбу қонунчилик талабига риоя этмаганлиги учун жавобгарликни назарда тутувчи ўзгартириш ва қўшимчалар киритилмоқда.

Шунингдек, сенатга кўра, қонунда ота-оналар ёки уларнинг ўрнини босувчи шахсларнинг ўз болаларини шахсий эътиқодларига мувофиқ диний ва ахлоқий жиҳатдан тарбиялаш ҳуқуқи аниқ баён қилинмоқда. «Мазкур норма Фуқаролик ва сиёсий ҳуқуқлар тўғрисидаги халқаро пактнинг 18-моддасида белгиланган қоидалар асосида киритиляпти», дейилади сенат ахборотида.

Ота-оналар ёки уларнинг ўрнини босувчи шахслар томонидан болани қонунга хилоф равишда диний таълим олиш жараёнига жалб қилганлик учун маъмурий жавобгарлик белгилаш таклиф этилмоқда. Тегишли қонун лойиҳаси Олий Мажлис Қонунчилик палатасининг навбатдаги мажлисида депутатлар томонидан кўриб чиқилган ва қабул қилинган.

Ушбу қонун лойиҳаси шу йилнинг 25 июнь санасида Қонунчилик палатаси томонидан қабул қилинган эди, ҳужжат кейинроқ жамоатчилик муҳокамасига чиқарилган.

Қонун президент томонидан имзолангач, ҳужжатнинг ўзи белгиланган муддатда кучга киради.