Консерватор Мишел Барне Франциянинг янги бош вазири бўлди

Франция президенти Эммануэл Макрон 73 ёшли консерватив сиёсатчи Мишел Барнени мамлакат бош вазири лавозимига тайинлади. «У унга мамлакат ва француз халқига хизмат қиладиган бирлаштирувчи ҳукумат тузишни топширди», — дея хабар берди Елисей саройи матбуот хизмати 5 сентябр, пайшанба куни.

Тайинлов давлат раҳбари ва Франциядаги асосий сиёсий кучлар вакиллари ўртасида «мисли кўрилмаган кўп маслаҳатлашувлар»дан сўнг амалга оширилди. Le Figaro газетасининг таъкидлашича, Барне замонавий тарихдаги энг ёш, 35 ёшли Габриэл Атталнинг ўрнига Франция вазирлар маҳкамаси энг кекса раҳбари бўлди.

Ҳукумат ва Европа Иттифоқи тузилмаларида иш тажрибаси

Мишел Барне ўнг марказчи Республикачилар партияси вакили. Сиёсий фаолияти давомида у Францияда ҳам, Европа Иттифоқи тузилмаларида ҳам турли раҳбарлик лавозимларида ишлаган. 2016 йилдан 2019 йилгача у Буюк Британиянинг ЕИдан чиқиши шартлари бўйича музокараларга раҳбарлик қилган.

2021 йилда Барне Республикачилар партиясидан президентлик сайловларида иштирок этиш учун ўз номзодини таклиф қилди, аммо партия ичидаги овоз беришнинг биринчи босқичида мағлуб бўлди.

Францияда сайловлар ва Атталнинг истеъфоси

Габриэл Аттал июл ойида, президент Макроннинг марказчи блоки иккинчи ўринни эгаллаган ва Миллий ассамблеядаги кўпчиликни йўқотган навбатдан ташқари парламент сайловлари натижалари маълум бўлганидан кўп ўтмай, истеъфога чиқиш ҳақида ариза берган эди.

Сайлов натижаларига кўра биринчи ўринни 182 депутатлик мандатига эга бўлган «Янги халқ фронти» сўл қанот коалицияси эгаллади. Президентнинг «Республика учун бирга» коалицияси парламентда 168 ўринга эга. Республикачилар партиясидаги иттифоқчилари билан ўнг қанот Миллий митинг партияси 143 ўринни қўлга киритди. Палатада мутлақ кўпчилик бўлиши учун партия 289 ўринга эга бўлиши керак.