«Манчестер Юнайтед» ва «Арсенал»нинг сэр Алекс Фергюсон ва Арсен Венгернинг узоқ йиллик бошқарувидан кейин йўлиққан муваффақиятсизликлари сингари, «Ливерпул»га ҳам Юрген Клоппнинг 9 йиллик эрасидан сўнг, турнир жадвалининг юқори қисмидаги ўрнини сақлаб қолиш қийин кечиши тахмин қилинганди.
Аммо мана Арне Слот мерсисайдликлар билан 10 та ўйин ўтказди: клуб Англия лига кубогида 4-босқичда, Чемпионлар лигасининг лига босқичида максимал очко тўплаб турибди ва Англия Премер-лигаси турнир жадвалининг биринчи ўрнида бормоқда. 46 ёшли мутахассис «Ливерпул»даги дастлабки 10 учрашувининг 9 тасида ғалаба қозонган биринчи мураббий бўлди. Умуман, мавсум бошидаги илк 10 ўйинда 9 та ғалабага «Ливерпул» ўз тарихида 3 марта эришган (бундан аввал: 1961/62, 1990/91 йилги мавсумларда).
Ва бу шунчаки бошланиши эканлигини ҳам эслатиб ўтиш жоиз. Унаи Эмери «Арсенал»даги 10 та учрашувининг 8 тасини ютган эди, кейин эса… «Фейеноорд»нинг собиқ мураббийи учун ҳам бир зумга огоҳликни қўлдан бой бериш мумкин эмас, чунки «Ливерпул» ҳам катта ўзгаришлар арафасида бўлиши мумкин. Ҳар ҳолда, етакчилардан уч нафари: Муҳаммад Салоҳ, Виржил ван Дейк ва Трент Александр-Арнолднинг клуб билан амалдаги шартномалари келгуси йил ёзида якунига етади ва ҳозирча улар билан келишувлар узайтирилиши борасида жиддий гап йўқ.
«Ливерпул»нинг статистикалари мавзусига қайтамиз ва улар айниқса, меҳмондаги учрашувларда ажойиб кўриниш олган, зеро сафардаги учрашувларда «Ливерпул» 100 фоиз натижа қайд этди. Улар орасида «Милан» ва «Манчестер Юнайтед»га қарши катта ўйинларда эришилган ғалабалар ҳам борлиги ушбу натижа қийматини оширади. Солиштириш учун, «Ливерпул» ўтган мавсумда меҳмондаги 19 ўйиннинг фақат 9 тасида ғалабага эриша олган (7 дуранг, 3 мағлубият). «Ливерпул»нинг муваффақиятли старти ҳақидаги рақамларни ўрганишда улар энг қулай тақвим асосида ҳаракат қилганини ёддан чиқармаслик керак: «Ипсвич Таун», «Брентфорд», «Манчестер Юнайтед», «Ноттингҳем Форест», «Борнмут», «Вулверҳемптон» ва «Кристал Пелас».
Муваффақиятнинг асосий сабабларидан бири «Ливерпул»нинг собиқ мураббийи Юрген Клоппнинг услуби янгисиникига жуда ўхшаш бўлганида, дейиш мумкин. Уларнинг ҳар иккиси 4 нафар ҳимоячи билан ҳаракатланади ва қанотда катта масофа босиб ўтиб, рақиб ҳудудига ёриб кириш қобилиятига эга вингерлардан унумли фойдаланади. Яримҳимоядаги услуб бироз фарқ қилса-да, ҳар икки мураббийнинг талаби ҳам марказдаги футболчилардан жамоанинг қолган қисми учун ҳам «қора меҳнат» қилишига асосланади.
TNT Sports каналига мавсум аввалида берган интервюсида Арне Слотнинг ўзи ҳам ушбу масалага тўхталиб ўтганди: «Менимча, сиз ҳам мавсумолди йиғинда ўтказган учрашувларимизда қураётган услубимиз Юрген Клоппникига жуда ўхшаш эканига гувоҳ бўлдингиз. Биз худди Юрген даврида бўлганидек тўпга эгалик қилишни хоҳлаймиз ва тўпсиз ҳаракат қилган вақтимизда интенсив прессинг амалга оширишга ҳаракат қиламиз. Юрген даврида жамоа тўп билан ҳам жуда интенсив ҳаракат қиларди, лекин мен тўп назорати бизда кўпроқ сақланиб қолинишига қарши эмасман. Балки, Юрген ҳам тўп назоратини ушлаб туришга қарши бўлмагандир, лекин менинг услубимда биз тўпни кўпроқ ўз ихтиёримизда сақлаб туришга уринамиз».
