Стефанишина: Европа Иттифоқи ва НАТОда АҚШнинг Украинага ёрдами борасида ваҳима йўқ

Украинанинг Европа Иттифоқи ва НАТОдаги ҳамкорлари АҚШдан Киевга бўлажак ёрдам кўрсатиш борасида ноаниқ вазиятда хотиржам ҳаракат қилмоқда, деди Украина бош вазирининг Европа ва Евроатлантика интеграцияси бўйича ўринбосари Олга Стефанишина 30 январ, пайшанба куни Брюсселда.

«Таъкидлашим мумкинки, ҳеч қандай ваҳима, хавотир йўқ, Украина 2025 йил учун молиявий тўлов қобилияти билан таъминланган, НАТО эса ҳарбий ёрдамни мувофиқлаштиришни ўз зиммасига олди, яъни бизда бу борада катта узилишлар бўлмайди. 2025 йил ҳал қилувчи йил бўлади деган фикр бор ва шунга кўра, Европа Иттифоқи бу Украина учун муваффақиятли бўлишини таъминлаш борасида барча саъй-ҳаракатларга тайёр», деди Стефанишина Брюсселда Европа дипломатияси раҳбари Кая Каллас билан учрашувдан сўнг DW нашрига. 

Украина бош вазири ўринбосари НАТОнинг Киевга ҳарбий ёрдам кўрсатишни мувофиқлаштириш бўйича миссияси NSATU феврал ойидаёқ тўлиқ ишга тушиши мумкинлигини таъкидлади: "У аллақачон мувофиқлаштиришни қисман ўз зиммасига олган ва аслида бу Украина ўзини хотиржам ҳис қилиши учун етарли шароит яратади".

Бундестаг Украинага ёрдам кўрсатиш бўйича бир қарорга келолмади

Украинага ёрдам кўрсатиш учун қўшимча маблағ ажратиш масаласи бўйича партиялар ўртасидаги келишмовчиликлар 30 январга ўтар кечаси Германия Бундестаги сессиясининг муддатидан олдин тугатилишига олиб келди. 

Эркин демократик партия (ЭрДП)нинг бюджетдан ташқари харажатлар учун 3 миллиард еврогача маблағ ажратиш таклифи атрофидаги мунозаралар тахминан соат 00:30 да парламент ўз кворумини йўқотиши билан якунланди: ЭрДП таклифи бўйича овоз беришда атиги 320 нафар парламент аъзоси иштирок этди. Кворумга эришиш учун парламентнинг 733 аъзосининг ярмидан кўпи ҳозир бўлиши керак.

Охир-оқибат, "90-алянс"/"Яшиллар" партиясидан Бундестаг раиси ўринбосари Катрин Гёринг-Эккардт карбонат ангидрид ташламалари нархи бўйича режалаштирилган муҳокама кун тартибида қолган бўлса-да, ялпи мажлисни эрта ёпишга қарор қилди.