“Ижодкор” фирибгарлар: бунақалари киноларда ҳам учрамайди
|23:05 / 06.02.202513 76510 мин
Алдаш – фирибгарлик жиноятининг асоси. Буни касб қилиб олганлар бировларни алдаш учун шундай ёлғонлар ўйлаб топишадики, уларнинг “ижодкор”лиги кишини ҳайратга солади. Kun.uz 2024 йилда Ўзбекистонда содир этилган энг ғаройиб фирибгарликларни тўплади. Уларда фирибгарлар “ўлжаси”ни кўзига қараб турган ҳолда алдаб, пул ёки мулкини эгаллаб олган.
Ўзбекистонда ҳар йили минглаб фирибгарлик жинояти содир этилади. Уларнинг аксарияти алдов йўли билан ўзга шахслар ишончига кириб, пул ёки мулкини эгаллаб олиш билан боғлиқ. Kun.uz 2024 йилда республикада содир қилинган ғаройиб фирибгарликларни тўплади.
Таксистларни “ухлатган” йигит
Зангиота туманида яшовчи 20 ёшли йигит киракашларни чув туширишни мақсад қилади. Бунинг учун у жуда оддий ёлғон ўйлаб топган ва киракашлар бу ёлғонга ишонган.
Фирибгарлик схемаси қуйидагича: йигит Тошкент шаҳри кўчаларида юриб, йўловчилардан телефонидан бирор дақиқага фойдаланиб туришни сўраган ҳамда ўзи турган манзилга Яндекс чақирган. Чақирув бўйича келган таксист қўлига эса пакетга ўралган буюмни (ҳид таратувчи аксессуар) тутқазиб, бирор манзилга етказиб беришни сўраган.
“Манзилда сизни кутиб олган одам “почта” учун 300 минг, йўл ҳақи учун 100 минг сўм беради. Сиз менга “почта” пулини бериб кетаверасиз”, дея алдаган у жабрланувчиларни.
Таксистлар унинг гапига ишониб, “почта” пулини йигитга тутқазиб, айтилган манзилга йўл олишган. Манзилга етиб борганида эса алданганини билишган. Илова бўйича таксини чақирган одамга боғланишса, у бегона бўлиб чиқаверган.
Йигит шу услубда бир эмас, икки эмас, 6 ҳолатда таксистларни турли миқдордаги пулга чув туширган. Аммо охири қўлга тушган.
Судда йигит барча қилмишларини тан олган ва ушбу ишларда умуман шериги бўлмаганини, бир ўзи содир этганини билдирган. Суд ҳукми билан унга иш ҳақининг 20 фоизини давлат даромади ҳисобига ушлаб қолган ҳолда 3 йил ахлоқ тузатиш ишлари жазоси ва БҲМнинг 70 баравари (23,8 млн сўм) жарима жазоси тайинланган.
Текинга тушган “минг тиш”
Мазкур фирибгарлик жинояти 2024 йил 17 октябр куни Ангрен шаҳрида содир бўлган. 44 ёшли аёл шаҳарнинг Сағбон маҳалласида яшовчи фуқарога (аёл киши) ўзини “эски-туски” нарсаларни сотиб олувчи сифатида таништирган.
“Мўйна, яъни ҳайвон ёқаларини сотиб оламан”, деган у. Аёл мўйна борлигини айтиб, уйга кириб кетган ва бироздан сўнг палто ёқасини кўтариб чиққан. Бироз савдолашишдан сўнг мўйна 50 минг сўмга сотиб олинган.
“Қани, олиб беринг-чи, аввал кўрайлик”, деган эски-тускичи. Сўнгра “Минг тиш” дея аталувчи зиракни қўлига олиб, у ҳақиқий тилла эмаслигини, ишонмаса исботлаб беришни билдирган.
Шу тариқа фирибгар зиракни ўзининг ёнидаги аллақандай суюқликка солган. Шунда зирак қорайиб қолган.
“Ана, кўрдингизми, қорайиб қолди. Тилла қораймайди ахир. Истасангиз зирагингизни эртага оқартириб келтириб бераман. Унгача сизга ўзимнинг мана бу зирагимни қолдириб кетаман”, деган у устамонлик билан.
Фирибгар ўзининг сохта зирагини қолдириб, ўрнига ҳақиқий тилла зиракни олиб кетган. Ёши анча катта бўлган аёл унинг гапига ишониб қолаверган. Орадан 4-5 кун ўтиб, йўли яна Ангрен шаҳрига тушган фирибгар профилактика инспектори томонидан тўхтатилиб, ҳолат аниқлаштирилган ва унга нисбатан жиноят иши қўзғатилган.
Суд ҳукми билан фирибгар аёлга 8 йил муддатга озодликдан маҳрум қилиш ва БҲМнинг 50 баравари (18 млн 750 минг сўм) жарима жазоси тайинланган. Тайинланган озодликдан маҳрум қилиш жазоси Жиноят кодексининг 72-моддасига асосан шартли ҳисобланиб, 3 йил синов муддати белгиланган.
“Подездчи” фирибгар
1993 йилда туғилган йигит томонидан Қўқон шаҳрида содир этилган “серияли” фирибгарлик ҳам ҳеч кимнинг хаёлига келмаган схемага асосланган. У асосан бировларнинг телефонини қўлга киритиб, сотиб юбориш орқали пул топишни мақсад қилган. Унинг “ўлжаси” ҳам асосан таксистлар бўлган.
Йигитнинг дастлабки “ови” шундай бўлган: у йўловчи сифатида таксига минган ва Қўқон шаҳар, Алишер Навоий мавзеси, 32-уйнинг ёнига борган.
“Мана шу соатни сотиб олмоқчиман. Телефонингизга суратга олиб, акамга кўрсатиб чиқсам бўладими? 5 дақиқада қайтаман, сиз шу ерда кутиб туринг”, деган у гўё уйига келган каби тутиб ўзини.
Киракаш унинг соддалик билан айтган гапига ишонган ва майли деган. Йигит таксистнинг 1,5 млн сўмлик телефонини олиб, соатни суратга туширган. Сўнгра соатни таксистга бериб, ўзи “дом” подездига кириб кетган.
“Иши юришган” йигит бир неча кундан сўнг яна бир таксистни йўл ҳақини уйдан чиқариб бериш шарти билан ўша ҳудудга бошлаб борган.
“Телефонингизни бериб туринг, уйдагиларга қўнғироқ қилиб олай, пул олиб тушишсин”, деган шоввоз таксистнинг 2 млн сўмлик телефонини олиб, ўзини гўёки гаплашган ҳолда уйга кириб чиқаётгандек тутиб, иккинчи томони ҳам очиқ бўлган подездга кириб кетган. У шу кетиши бўйича ғойиб бўлган.
Йигит шу услубда ўндан ортиқ киракашнинг телефонини ўмарган ва сотиб, ўз эҳтиёжларига ишлатиб юборган.
Суд ҳукми билан унга 3 йил муддатга ахлоқ тузатиш ишлари жазоси тайинланган. Жабрланувчиларга етказилган зарар йигитнинг оила аъзолари томонидан қопланган.
Сигаретга кетган дўст
Самарқанд вилоятининг Ургут туманида содир қилинган мазкур фирибгарлик жинояти “Гугуртга кетиб” филмини ёдга солади: дўстининг машинаси билан сигарет олиб келишга кетган дўст қайтмайди. Бу қандай содир бўлган?
2002 йилда туғилган, Ургут туманининг Чағизғон маҳалласида яшовчи йигит ёш бўлишига қарамай “хавфли рецидивист” деган номни эгаллаган. Сабаби у бунгача ҳам бир неча бор жиноят содир қилиб, судланган.
Йигит 2024 йил 29 август куни дўстининг Cobalt машинасида Ургут тумани Чорчинор маҳалласидаги сой бўйига дам олишга боради. Кечга яқин дўстларнинг сигарети тугайди.
“Дўстим, машинангни бериб тур, қишлоққа бориб сигарет олиб келай”, дейди у. Дўсти эса ишониб, унга машина калитини тутқазади. Афсуски, сигаретга кетган дўст қайтмайди.
Йигит машинани бошқариб, Самарқанд тумани Диёр маҳалласидаги автомашиналарни таъмирлаш устахонасига боради. Ўша ерда машина “коробкаси” ва хотира қутисини, жами 29,2 млн сўмлик эҳтиёт қисмларини ечиб олиб, Тошкент шаҳрининг Сергели туманига келтириб 900 долларга сотиб юборади. Машина эгаси уни кутиб ўтирган бир пайтда йигит дўстини чув тушириб кетганди.
Бундан ташқари, хавфли рецидивист Тошкент шаҳрида кунига 700 минг сўм ижара тўлаш шарти билан Lacetti машинасини олиб, унинг 14 млн сўмлик эҳтиёт қисмларини ечиб сотиб юборган.
Суд ҳукми билан йигитга 5 йил 1 ой муддатга озодликдан маҳрум қилиш жазоси тайинланган. Жазони қаттиқ тартибли колонияда ўташ белгиланган.
Тўйхонанинг сохта эгаси
2024 йил сентябр ойида Тошлоқ туманида содир бўлган фирибгарлик жиноятида ҳам жабрланувчилар жуда оддий ва кутилмаган шаклда алданган. Ушбу фирибгарликни 1988 йилда туғилган хавфли рецидивист содир қилган.
У 2024 йил 23 сентябр куни Тошлоқ тумани, Садда маҳалласидаги “Турон” тўйхонаси олдига келган ва ким тўй ўтказаётганлигини билиб олган. Сўнгра туман марказидан “Роял” такси фирмасига такси кераклиги ҳақида буюртма қилган.
Буюртмага асосан етиб келган такси ҳайдовчисига телефон орқали “Турон” тўйхонасига боришни ҳамда телефонни тўй эгасига беришни айтган. Таксист айтилгани каби тўйхонага бориб, телефонни тўй ўтказаётган фуқарога берган.
“Мен тўйхона эгасиман, касса учун тўловларни қилаётгандим, тўйхона пулини бериб юборсангиз”, деган фирибгар тўй эгасига. Унинг гапига ишонган тўй эгаси эса 3 млн сўмни таксистга тутқазган. Такси ҳайдовчиси эса пулни фирибгарга келтириб берган.
Тўй якунига етгач тўйхонанинг ҳақиқий эгаси тўйчилардан пулни сўраган. Тўй эгаси эса ҳолатдан ҳайрон бўлиб, бошини ушлаб қолаверган.
Суд ҳукми билан фирибгарга иш ҳақининг 20 фоизини давлат даромади ҳисобига ушлаб қолган ҳолда 2 йил 7 ой муддатга ахлоқ тузатиш ишлари жазоси тайинланган. Тўй эгасига етказилган зарар эса қопланган.
