Россияда банк мобил иловаларидан пул ўғирлайдиган вирус тарқалгани айтилди

Android учун мўлжалланган SpyNote банк троян вируси сўнгги 6 ой ичида Россияда содир бўлган ўғирликларнинг тахминан 40-50 фоизида иштирок этган, деди Россия Марказий банки раҳбари Элвира Набиуллина.

Унинг сўзларига кўра, зарарли дастурдан фақат баъзи банклар ҳимояланган. Набиуллина қайси банкларнинг иловалари ҳали ҳам вирусдан ҳимоясиз эканлигини айтмади.

«Вирус турли зарарсиз дастурларни тақлид қилади ва бу зарарли дастур ёрдамида фирибгарлар маълум вақт телефонни кузатиб боради, паролларни кўради, SMS хабарларни ўқийди. Кейин улар банк иловасини масофадан осонгина очиб, ҳисобда ҳеч нарса қолдирмасдан пулларни ўмаради», деди Россия Марказий банки раҳбари «Молияда киберхавфсизлик» форумида.

Набиуллина банк сектори мижозларни вирусдан ҳимоя қилиш устида иш олиб бораётганига ишонтирди. «Биз барча банклар бу муаммони имкон қадар тезроқ, энг кеч чорак охиригача ҳал этиши учун ҳаракат қиламиз», деди у.