Шимолий Македонияда тунги клубда юз берган ёнғин иши бўйича 20 га яқин одам ҳибсга олинди

Шимолий Македония ички ишлар вазири Панче Тошковски Кочани шаҳридаги Pulse тунги клубида юз берган ёнғин ишини тергов қилиш доирасида дастлабки ҳибсга олишлар амалга оширилганини маълум қилди. Reuters маълумотларига кўра, 20 га яқин одам қўлга олинган, BBC эса уларнинг сони 15 кишини ташкил этиши ҳақида ёзди.

Қўлга олинганлар орасида Pulse клуби эгасининг ўғли, амалдорлар, клубда чиқиш қилган DNK дуэти иштирокчиларидан бири ҳам бор. Шунингдек, расмийлар ёнғин оқибатида жабрланган камида уч кишини ҳам ҳибсга олиш бўйича қарор қабул қилган.

Шимолий Македония бош вазири Христиан Мицкоски Иқтисодиёт вазирлиги Pulse клубига лицензияни ноқонуний равишда берганини маълум қилди. Ҳукумат раҳбари барча айбдорлар «ким бўлишидан қатъи назар» суд қаршисида жавоб беришини ваъда қилди.

Pulse тунги клубида 16 март кечаси ёнғин содир бўлди. DNK дуэтининг чиқиши давомида клубда пиротехника воситаларидан фойдаланилган, натижада шифтда ёнғин чиққан ва томошабинлар ягона эшик орқали ташқарига чиқишга уринган. Прокуратура вакилларига кўра, DNK иштирокчиларининг фақат бир нафари омон қолган ва у шифохонада.

Сўнгги маълумотларга кўра, тунги клубда юз берган ёнғин оқибатида 59 киши ҳалок бўлган, жумладан уч нафар бола ҳам. Шунингдек, 155 киши жароҳат олган, уларнинг 20 нафардан ортиғи — болалар. Расмийлар жароҳат олганларнинг 20 нафари аҳволи оғир эканини маълум қилган. Шимолий Македонияда етти кунлик миллий мотам эълон қилинган.