Россия ва АҚШ президентлари Владимир Путин ва Доналд Трамп бугун телефон орқали мулоқот қилади. Мулоқот Тошкент вақти билан соат 18:00 дан 20:00 гача вақт оралиғида бўлиб ўтади. Бу Трамп 20 январда АҚШ президенти лавозимига қайтганидан бери Россия ва Америка етакчиларининг иккинчи расмий телефон суҳбати бўлади. Биринчиси 12 февралда ўтказилган, унда Трамп ва Путин Россиянинг Украина билан урушини тўхтатиш бўйича музокараларни бошлашга келишиб олганди.
Кейин нималар бўлди:
18 феврал куни Россия ва АҚШ делегациялари Саудия Арабистонида учрашди. 28 феврал куни АҚШга ташриф билан келган Украина президенти Володимир Зеленский Оқ уйда тинчлик келишуви параметрларини муҳокама қилиш чоғида Доналд Трамп билан тортишиб қолганди. Ушбу можародан сўнг АҚШ Украинага барча ҳарбий ёрдамни тўхтатди. Ёрдам бир ҳафта ўтгач – 11 март куни АҚШ ва Украина делегацияси Саудия Арабистонида учрашганидан кейин қайта тикланди. Ушбу учрашувда Украина АҚШнинг Россия билан 30 кунлик ўт очишни тўхтатиш таклифига рози бўлди. Владимир Путин ҳам умуман олганда рози экани, аммо ўт очишни тўхтатиш «узоқ муддатли тинчликка» олиб келиши ва «бу инқирознинг асл сабаблари»ни бартараф этиши кераклигини таъкидлади. 13 март куни Путин Москвада Трампнинг махсус вакили Стив Уиткофф билан учрашиб, сулҳ параметрларини муҳокама қилди. Айнан Уиткофф ўтган ҳафта охирида Трамп ва Путин яқин кунларда яна қўнғироқ қилишини биринчи бўлиб эълон қилганди.
Путин билан бугунги мулоқотдан олдин Трамп Украина бўйича тинчлик келишувининг «кўплаб элементлари» аллақачон келишиб олинганини айтди. «Биз [Россия президенти билан] ер, электр станциялари ҳақида гаплашамиз. Аммо буларнинг аксарияти иккала томон, Украина ва Россия томонидан аллақачон муҳокама қилинган. Биз аллақачон бу ҳақда гапиряпмиз – муайян активларни бўлишиш ҳақида», – деди Трамп 17 март куни журналистларга.
Кремл Путин ва Трамп музокаралари мавзусини ошкор қилмаяпти
