«Туркия кўчадан топиб олинган эмас»: Эрдўған яна мамлакатдаги митингларга қарши чиқди

Туркия президенти Ражаб Тоййиб Эрдўған давлат кўча терроризмига таслим бўлмайди, чунки мамлакат «кўчадан топиб олинган эмас» деди. Унинг сўзларига кўра, мухолифат турк халқини полиция ходимлари жароҳатланган намойишларда қатнашишга чақириш орқали барқарорликка тажовуз қилмоқда. Мухолифат етакчиси Ўзғур Ўзелнинг айтишича, митинглар давом этади. Шунингдек, у хавфсизлик кучларини қурол ва қалампир газидан фойдаланмасликка чақирди.

Туркия президенти Ражаб Тоййиб Эрдўған ҳукумат кўчаларда содир бўлаётган террорга кўз юммаслигига ваъда берди.

«Маргинал гуруҳларга эргашиш, полициямизга ҳужум қилиш, судя ва прокурорларимизга таҳдид қилиш, демократия ва миллий иродага қарши чиқиш, ноқонуний ва нодемократик усулларга мурожаат қилиш орқали биз бу мамлакатда ҳеч нарсага эриша олмаймиз. Туркия кўчадан топиб олинган давлат эмас. Туркия кўча терроризмига таслим бўлмайди», деди Эрдўған.

Унинг таъкидлашича, ҳукумат «Туркияни террор қилиш» уринишларига ва турк халқининг барқарорлигига қарши ҳужумларга тоқат қилмайди. Президентнинг айтишича, митингларга чақирувлар боши берк кўчадир. Эрдўғаннинг сўзларига кўра, бундай ҳаракатлар ноқонуний ҳисобланади, айниқса намойишлар чоғида полиция ходимлари жароҳат олса. Унинг таъкидлашича, тартибсизликлар коррупцияга қарши операция баҳонасида юзага келган, шунда даромад олиш ва талончилик схемалари яширин қолади.

Мухолифатдаги Республика халқ партияси раиси Ўзғур Ўзел мухолифат намойишларни тўхтатиш ниятида эмаслигига ишора қилди. Шунингдек, у хавфсизлик кучларини намойишчиларга қарши қалампир газидан фойдаланишни бас қилишга чақирди. Турк оммавий ахборот воситалари полиция ҳатто резина ўқлардан ҳам фойдаланаётганини даъво қилмоқда, аммо расмийлар айбловларни инкор этмоқда. Намойишлар натижасида бир неча намойишчи тиббий ёрдам сўраб мурожаат қилган, 16 нафар ҳуқуқ-тартибот ходими жароҳатланган.