Бош прокуратура Пискендаги колонияда асоссиз интизомий жазога тортилган маҳкум иши бўйича маълумот берди

Бош прокуратура Тошкент вилоятидаги 50-сон манзил-колонияда жазо муддатини ўтаётган маҳкум қийноққа солиниб, сўнг асоссиз равишда интизомий бўлинмага жойлаштирилганига оид иш юзасидан маълумот берди.

Пискент туманидаги колонияда жазо муддатини ўтаётган маҳкум колония ходимлари томонидан қийноққа солиниб, 10 сутка интизомий бўлинмага жойлаштирилгани тўғрисида хабар берилганди.

Аниқланишича, 36 ёшли маҳкум Т.И.га суднинг тегишли ҳукмига кўра, озодликдан маҳрум қилиш жазоси тайинланиб, у манзил-колонияга 2024 йил 1 декабрь жазо муддатини ўташ учун келтирилган. Т.И. колониядаги ички тартиб қоидаларини бузганлиги сабабли колония бошлиғининг 2025 йил 28 февралдаги қарорига асосан ўн сутка интизомий бўлинмага киритиш тариқасидаги интизомий жазога тортилган.

Қарор Тошкент махсус прокуратура томонидан ўрганилиб, 4 март куни интизомий жазони бекор қилиш бўйича протест келтирилган. 5 март куни эса маҳкум Т.И. соғлиғидан шикоят қилиб, Пискент тумани тез тиббий ёрдамга мурожаат қилган ва 15 март кунига қадар Терапея бўлимида «ўткир бронхит ва сурункали танзилит касаллиги» ташхиси билан даволанган.

Пискент тумани тиббиёт бирлашмасининг 1798/31-сонли тиббий баённомасидан кўчирмада маҳкум Т.И.да тан жароҳатлари борлиги аниқланмаган.

Прокуратура томонидан маҳкум Т.И. колония ходимлари томонидан қийноққа солинганлиги ҳолати ўрганилиб, воқеа жойи кўздан кечирилган ҳамда маҳкум соғлиғидан шикояти йўқлиги сабабли суд-тиббий экспертизасидан ўтишдан бош тортган.

Колония ходимларининг хатти-ҳаракатларига ҳуқуқий баҳо бериш учун хизмат текшируви тайинланган.

Тошкент махсус прокуратура томонидан терговга қадар текширув ҳаракатлари ўтказилмоқда.