France24 Россия ракета зарбаси вақтида Кривий Риҳдаги ресторанда ёзиб олинган кадрларни намойиш этди

France24 телеканали 4 апрел куни Кривий Риҳда Россия қўшинлари ракета зарбасига дучор бўлган ресторанга ўрнатилган кузатув камераларидан олинган кадрларни намойиш этди.

Россия Мудофаа вазирлиги ракета «бўлинмалар командирлари ва ғарблик инструкторлар йиғилиши» бўлиб ўтаётган ресторанга отилганини маълум қилганди.

France24 томонидан эълон қилинган видеода эса ҳарбийлар кўринмаган. Телеканал мухбири зарба вақтида ресторанда бўлган ва жароҳатлар билан шифохонага ётқизилган икки аёл билан суҳбатлашди. Улар «гўзаллик форуми»да иштирок этганликларини тасдиқлаган.

Аввалроқ «Система» лойиҳаси Россия ракетаси келиб тушган ҳудудда RoseMarine номли (аввал «Магеллан» деб аталган) биргина ресторан жойлашгани, бу ерда ўша куни гўзаллик саноати ходимлари форуми ўтказилганини аниқлаганди.

Тадбир ташкилотчиси бўлган «Кривий Риҳ бизнес иттифоқи» бу ҳақда 24 феврал куни ўз телеграм-каналида ва бошқа маҳаллий каналларда анонс берган. Постлар таҳрирланмаган ва олдиндан эълон қилинган.

Уюшма вакили нашрга 4 апрел куни мазкур ресторанда чиндан ҳам гўзаллик форуми бўлиб ўтганини тасдиқлаган. Унинг сўзларига кўра, тадбир тахминан тўрт соат давом этган ва иштирокчиларнинг асосий қисми 18:30 атрофида тарқалган. Россия мудофаа вазирлиги маълумотида ресторанга зарба соат 18:49 да йўллангани айтилган. «Система» суҳбатдошининг сўзларига кўра, форум билан бир вақтда ресторанда туғилган кун бўлиб ўтган, унда ёшлар ва болалар кўп эди.

Кривий Риҳ бўйлаб 4 апрел куни берилган зарба оқибатида 20 киши ҳалок бўлган, шундан тўққиз нафари болалар. Ўнлаб кишилар жароҳатланган ва шифохонага ётқизилган.