Тожикистонда интернетда «лайк» босганлик учун жиноий жазо бекор қилинди

Айнан шу қилмиши учун Тожикистон қамоқхоналарида 1500 дан ортиқ одам қолмоқда.

Фото: Asia-Plus

Тожикистон парламентининг қуйи палатаси ижтимоий тармоқлардаги постларга «лайк» босганлик учун жиноий жавобгарликка тортилишига йўл қўйилмаслиги ҳақидаги тузатишни қабул қилди. Аввалроқ, президент Имомали Раҳмон фуқаролар интернетдаги материалларни ёқтиргани учун қамалаётганидан хавотир билдирган эди, деб хабар берди Asia-Plus.

Мажлиси Намояндагон (парламент қуйи палатаси) янги таркибининг 10 апрель куни бўлиб ўтган биринчи мажлисида «Тожикистон Республикаси Жиноят кодексига ўзгартишлар киритиш тўғрисида»ги қонун лойиҳаси бир овоздан қабул қилинди.

Унга кўра, интернетда эълон қилинган видео ва хабарлар остида эмодзи ва «лайк» қўйганлик учун жиноий жавобгарлик бутунлай бекор қилинди. Тузатиш Мажлиси Миллий томонидан маъқулланиб, президент томонидан имзоланиб, ҳукумат газетасида эълон қилинганидан кейин кучга киради.

Шу пайтгача Тожикистон фуқаролари интернетда чоп этилган тақиқланган материалларга «лайк» босганлик ёки улашганлик учун жиноий жавобгарликка тортилган.

Тожикистон бош прокурори биринчи ўринбосари Умед Каримзода сўзларига кўра, ҳозир 1507 нафар фуқаро интернетдаги видеолар ва репортажларни ёқтиргани, шунингдек, «террористик ва экстремистик мазмундаги шарҳ ва фикрларни» ёзгани учун қамоқда сақланмоқда.

Эслатиб ўтамиз, Тожикистон президенти Имомали Раҳмон 2024 йилнинг 29 октябрь куни интернетдаги «лайк»лар учун жиноий ишлар асоссиз қўзғатилаётганини танқид қилиб, «бу амалиётга чек қўйиш кераклигини» айтган эди.

#Имомали Раҳмон #интернет #Тожикистон