Зеленский россиялик тарғиботчиларга қарши санкциялар жорий қилди

Украина президенти Володимир Зеленский Миллий хавфсизлик ва мудофаа кенгашининг россияпараст арбоблар ва журналистларга қарши санкциялар ҳақидаги қарорини кучга киритди. Тегишли фармон 11 апрел, жума куни Украина давлати раҳбари сайтида эълон қилинди.

Фармонга кўра, санкция рўйхатига 18 та оммавий ахборот воситаси ва 71 нафар жисмоний шахс – ҳам россиялик, ҳам украиналиклар киритилган. Улар орасида «Россия 1» телеканали мухбири Александр Сладков, журналист Арина Шарапова ва Quest Pistols, «Грибы» гуруҳлари, қўшиқчи Луна билан ишлаган мусиқий продюсер Юрий Бардаш бор.

Украина президентининг сайтида эълон қилинган яна бир фармонда Россия «соядаги флоти» ва унинг фаолиятига алоқадор шахсларга нисбатан санкциялар жорий этилган. Чекловлар 59 кишига, жумладан, Россия Федерацияси ва Хитой фуқароларига тегишли.

Санкциялар, хусусан, Украина юрисдикциясидаги активларни музлатиш, капитални экспорт қилишни тақиқлаш ва агар мавжуд бўлса, давлат мукофотларидан маҳрум этишни ўз ичига олади.

«Янги санкциялар қадамлари. Биз уруш тарғиботчиларига ва Россияни оқлаётганларга босимни кучайтирмоқдамиз ва ҳамкорларимиз билан биргаликда Россия «соядаги флоти» фаолиятига тўсқинлик қилмоқдамиз. Тегишли фармонлар аллақачон сайтда», — деб ёзди Зеленский Telegram-каналида. Унинг қўшимча қилишича, Миллий хавфсизлик ва мудофаа кенгашининг мансабдор шахсларга нисбатан санкциялар бўйича яна бир қарори тайёрланмоқда, у яқин келажакда эълон қилинади.