Трамп Путинга Украинада ўт очишни тўхтатишга 3 кун муҳлат берди

Вашингтон Россия президенти Владимир Путиндан Украина бўйича ўт очишни тўхтатиш таклифига шу ҳафтанинг охиригача жавоб олишни кутмоқда. Бу ҳақда АҚШ президенти Доналд Трамп маълум қилди. 

«Уларнинг жавобини шу ҳафта, жуда яқин кунларда эшитамиз. Биз қотилликлар тўхтатишини хоҳлаймиз», — дейди Трамп.

Шунингдек, у ҳафта давомида — 24 апрелгача АҚШ ва Украина табиий ресурслар бўйича битим имзолаши мумкинлигини қўшимча қилди. Бу битим АҚШнинг Украинага берган ҳарбий ёрдами учун сарфланган маблағни қоплашга хизмат қилади. Bloomberg маълумотларига кўра, музокаралар давомида ушбу «қарз» миқдори уч баравар камайтирилган — 300 миллиард доллардан 100 миллиард долларгача.

Axios манбаларининг сўзларига кўра, агар Путин апрел ойининг охиригача ўт очишни тўхтатишга рози бўлмаса, АҚШ Россияга нисбатан янги санкциялар жорий қилишга тайёр. Fox News олдинроқ Трамп музокараларни атайлаб чўзаётгани учун Путиндан норози экани ҳақида ёзганди. Маълумотларга кўра, Оқ уй Россиянинг «соя флоти»га нисбатан кескин чораларни кўриб чиқмоқда. Трамп Россия нефтини харид қилаётган давлатларга нисбатан 500 фоизгача бож жорий қилиши мумкинлигини айтган эди.

18 апрел куни Россия ва Украина ўртасида энергетик объектларга нисбатан ўзаро зарба бермаслик бўйича мораторий муддати тугайди. Кремл уни узайтириш нияти борлигини ҳозирча билдирмаган. Президент ёрдамчиси Юрий Ушаковнинг айтишича, Россия мораторий атрофидаги вазият бўйича АҚШ томонига «муайян сигналлар»ни етказади.

Россия президентининг матбуот котиби Дмитрий Песков 17 апрел куни Украинадаги вазиятни ҳал этиш бўйича АҚШ билан музокараларда муаммолар борлигини тан олди. «Жараён анча мураккаб кетмоқда», — дейди у. Бунга сабаб сифатида Песков «Киев режими» ва Европа Иттифоқи давлатларини кўрсатган.

The Moscow Times’нинг Кремлга яқин манбаларига кўра, Путин Украина бўйича музокараларда максималистик позицияни сақлаб қолмоқда. Март охирларида Саудия Арабистонида ўтган музокараларда Россия делегацияси Украина таркибидаги тўртта област — Донецк, Луганск, Запорожжя ва Херсон тўлиқ маъмурий чегаралари билан РФга берилишини талаб қилган. Бундан ташқари, Москва яна бир област, масалан, Днепропетровск ёки Сумининг бир қисмини босиб олиб, кейинчалик уни Херсон ва Запорожжя билан алмашишни таклиф қилиши мумкин.