Хитойда ядровий бўлмаган водород бомба синовдан ўтказилди

Синов вақтидаги портлашдан сўнг икки сониядан ортиқ вақт давомида ҳарорати Целсий бўйича 1000 даражадан ошадиган оловли шар ҳосил бўлган.

Фото: AP

Хитойлик олимлар водород асосидаги портловчи қурилма таъсирини синовдан ўтказди. Тадқиқотда кўрсатилишича, улар ядровий материаллардан фойдаланмаган ҳолда портлашни амалга оширган. South China Morning Post’нинг ёзишича, қурилма Хитой давлат кемасозлик корпорациясининг сувости қуролларини ҳам ишлаб чиқариш билан шуғулланувчи Илмий-тадқиқот институти томонидан ишлаб чиқилган.

Бомбада магний гидриддан фойдаланилган. Кимёвий модда водородни сақлаш шаклларидан бири бўлиб, элемент концентрацияси 7 фоиздан ошади. Оддий портловчи модда ишга тушганда магний гидрид тез термал парчаланиб, водород газини ажратади. У эса алангаланиб, узоқ давом этадиган ёнғинни ҳосил қилади.

Олимлар оғирлиги 2 килограммга етадиган бомбани синовдан ўтказган. Портлашдан кейин икки сониядан кўпроқ вақт давомида ҳарорати Целсий бўйича 1000 даражадан ошадиган оловли шар пайдо бўлган. Тадқиқотда қайд этилишича, шунча миқдордаги тротил эквиваленти 15 баробар камроқ вақт давомида «мавжуд бўладиган» оловли шарни ҳосил қилган бўларди.

Қурилма яратувчиларининг таъкидлашича, мазкур бомбанинг портлаш интенсивлигини аниқ назорат қилиш мумкин. Бу эса катта ҳудуддаги нишонларни бир текисда яксон қилиш имконини беради.

Аввалроқ Хитой узлуксиз 30 соатгача парвоз қилишга қодир дронни тақдим этганди. Водород ёнилғисида ҳаракатланадиган ушбу учувчисиз учиш аппаратининг оғирлиги 50 килограммга етади.

#Хитой #водород бомба