Энергия самардорлиги агентлигига директор тайинланди

2019 йилдан буён Республика товар-хомашё биржасини бошқариб келган Зиёвиддин Бадриддинов янги ташкил этилаётган Энергия самарадорлиги миллий агентлигига раҳбар этиб тайинланди. Рақобат қўмитаси раиси ўринбосари Асадулла Қаюмов фаолиятини РТХБ раиси сифатида давом эттиради.

Зиёвиддин Бадриддинов / Фото: РТХБ

Ўзбекистон президентининг қарори билан, Бадриддинов Зиёвиддин Боситович Вазирлар Маҳкамаси ҳузуридаги Энергия самардорлиги миллий агентлиги директори этиб тайинланди.

У 2019 йил октябрдан буён Республика товар-хомашё биржаси бошқаруви раиси лавозимида ишлаб келаётганди.

Энергия самарадорлиги миллий агентлиги Ўзбекистон президентининг 2 апрелдаги фармони асосида ташкил этилмоқда.

Агентликка энергия самарадорлигини ошириш соҳасида ягона давлат сиёсатини юритиш, соҳада рағбатлантирувчи ва таъсир этувчи чоралар ишлаб чиқиш ва тартибга солиш; энергия тежашдан даромад олувчи энергия сервис компаниялари (ЭСКО) хизматлари бозорини ривожлантириш ва бошқа вазифалар юклатилган.

Асадулла Қаюмов / Фото: Рақобат қўмитаси

Бадриддиновнинг ўрнига, товар-хомашё биржаси раиси лавозимига Қаюмов Асадулла Ўролович тайинланди. У тайинловга қадар 2022 йилдан буён Рақобат қўмитаси раисининг биринчи ўринбосари, ўринбосари лавозимларида ишлаб келаётганди.