Трамп Лондондаги Украина музокараларини ижобий баҳолади

АҚШ президенти Доналд Трамп 23 апрель куни Лондонда Европа, Киев ва Вашингтон делегациялари ўртасида Россия-Украина можаросини тартибга солиш бўйича ўтказилган музокараларни юқори баҳолади. Трансляция Fox News томонидан олиб борилди.

Оқ уйда журналистлар билан суҳбатда Трамп учрашув самарали ўтганини ва можарони ҳал қилишда мумкин бўлган тараққиёт учун шарт-шароит яратилганини таъкидлади. «Ҳа, менимча, музокаралар яхши ўтди», деди Трамп.

Президент вазиятни ҳал қилиш учун «иккита кучли, ақлли одам келишиб олиши» кераклигини қўшимча қилди.

АҚШ президентининг Украина бўйича махсус вакили Кит Келлог ҳам Лондондаги музокараларни конструктив ва ижобий деб баҳолади.

Учрашувда Украина томонидан президент девони раҳбари Андрей Ермак, ташқи ишлар вазирининг биринчи ўринбосари Андрей Сибиха ва мудофаа вазири Рустем Умеров иштирок этди. Музокараларда АҚШдан кутилганидек Давлат котиби Марко Рубио эмас, балки Келлогнинг ўзи иштирок этди. Франция ва Германия ташқи ишлар вазирлари ўрнига ўз маслаҳатчиларини юборди.

АҚШ нашрларининг ёзишича, музокаралар чоғида ҳозирги фронт чизиғини музлатиш, Украинанинг НАТО аъзоси бўлиш ниятидан қайтариш ва эҳтимолий ҳудудий имтиёзлар, жумладан, Ғарбнинг Киевга хавфсизлик кафолатлари эвазига Қримни Россиянинг бир қисми сифатида тан олиш таклифлари муҳокама қилинган.

Аввалроқ, Вашингтон, агар реал тараққиётга эришилмаса, воситачи ролини қайта кўриб чиқиши мумкинлигини очиқ айтган эди.

Киев Қримни Россия ҳудуди деб тан олиш ўзи учун мутлақо номақбул эканлигини таъкидлади.

Москва Қримнинг ҳудудий мансублигини ёпиқ масала деб билади.