Шукрулло Исроиловга тегишли автомобилни олиб қочган йигит қамалди

Транспорт воситаси очиқ қолдирилганидан фойдаланган 1998 йилда туғилган Шерзод исмли шахс уни олиб қочган.

Фото: Видеодан кадр

Таниқли артист Шукрулло Исроиловга тегишли Mercedes-Benz автомобилини ўғирлаб кетган йигит суд ҳукми билан 2 йил муддатга озодликдан маҳрум қилинди. У Жиноят кодексининг 267-моддаси (транспорт воситасини олиб қочиш) билан айбланган эди.

Судда маълум бўлишича, олиб қочилган автомобил Исроиловнинг фарзанди номида бўлган. У машина олиб қочилганини билиб, ички ишлар органларига хабар берган.

Транспорт воситаси Тошкент шаҳри, Учтепа тумани, Заргарлик кўчасида тўхтатилган, уни бошқарган шахс жиноят-қидирув бўлими ходимларига топширилган.

Маълум бўлишича, 1998 йилда туғилган Шерзод исмли шахс транспорт воситасини очиқ қолдирилганидан фойдаланиб, уни олиб қочган.

«Шу машинани ҳайдаб кўришга қизиқардим. Машина очиқ турганди, олдида ҳеч ким йўқ эди, унга ўтириб, ҳайдаб кетдим. Шаҳар айланиб, Учтепа туманидаги «мойка» олдида тўхтаганимда ЙПХ ходимлари келиб ушлади. Қилган ишимдан афсусдаман», деди у судда.

«Машинамни қулфламасдан, калитни ичида қолдириб, бир жойга кириб кетдим. Ишимни битириб қайтиб чиқсам, машинам йўқ. Ўзимча кимдир мен билан ҳазиллашгиси келибди, деб ўйладим. Кейин 102 га қўнғироқ қилдим. 10 дақиқада машинамни топиб беришди. Ҳурматли ҳамшаҳарлар, ҳушёр бўламиз, машинангизни умуман очиқ қолдирманг», деди Шукрулло Исроилов.

Судда Исроиловнинг ўғли судланувчига нисбатан даъвоси йўқлигини билдирган.

#жиноятчилик #Шукрулло Исроилов #автоўғри