Финландия президенти Александр Стубб Доналд Трамп билан бўлиб ўтган телефон суҳбатидан кейин унинг «сабри тугашни бошлагани»ни маълум қилди.
Стуббнинг сўзларига кўра, 17 май куни у Трамп билан телефон орқали узоқ гаплашган, якшанба куни эрталаб эса Украина президенти Володимир Зеленский билан қўнғироқлашган.
«Зеленский сабрли, аммо Трамп [Владимир] Путинга нисбатан сабрини йўқотишни бошлаган», — дейди Стубб STT’га берган интервюсида.
Унинг таъкидлашича, охирги икки ҳафтада ишлар «Украина учун ижобий йўналишда» силжиган. Стуббнинг қўшимча қилишича, Финландия Зеленскийнинг 24-25 июн кунлари Ҳаагада бўлиб ўтадиган НАТО саммитидаги иштирокини қўллаб-қувватлайди.
14 май куни Италиянинг ANSA агентлиги дипломатик манбаларига таяниб, АҚШ Зеленскийнинг НАТО саммитига таклиф қилинишига қарши экани ҳақида ёзди. Ҳозирча саммитда иштирок этиш учун алянс таркибига кирмайдиган фақат тўртта давлат — Япония, Жанубий Корея, Австралия ва Янги Зеландия таклиф олган.
